E boluntad di Dios ta pa nos stima otro, pa nos trata otro bon tur momento y asina demostra cu nos ta yuinan di Dios.
Asina cu nos ta:
Menosprecia otro ,
Ganja riba otro,
Chercha otro,
Discrimina otro,
Perhudica otro,
Kibra otro,
Ofende otro, Maltrata otro, e amor di Dios no ta den nos.
Caminda e presencia di Dios ta e fruta di Spirito Santo ta wordo manifesta.
Den nos bida e fruta di Spirito ta santo tey, y e mester wordo biba, no solamente bisa cu Spirito Santo ta den nos pero e mester por wordo demostra.
Awor e buki di Galationan ta bisa nos bon cla cu tin nuebe fruta di Spirito santo.
Ta pesey nos tin cu busca tur manera pa e fruta di Spirito Santo ta abunda den nos, pa asina bondad di Dios, sali for di nos.
Mundo ta yena cu maldad, pero no ta pasobra mundo ta yena cu maldad, hende tin cu imita mundo.
Tur hende sa cu ora tin hopi stof, of ora awa ta cay , mester sera porta y bentana di cas, pa evita cu stof of awa ta yena bo cas.
Awel ta mesun cos nos tin di trata cu maldad, pasobra maldad kier penetra tur caminda, y si nos no sera porta pa inmoralidad, inhusticia, y perversidad cu kier influencia tur camimda, facilmente nos por wordo contamina.
Ta hopi cos tin ta pasando cu hende mester evita di participa den cosnan asina y tambe no apoyo locual ta contra boluntad di Dios, no ta importa ta ken ta hacie, porta ta bo propio yiu, bo ruman , maldad ta keda maldad y pica ta keda pica.
Pasobra como hende nos ta campeon pa wak den bida di otro hende, pero ora e ta toca nan nos porta, nos kier tolera y complace, pero esey no ta bini di Dios, pasobra ta tempo pa rechasa maldad y biba pa Dios.
Y no tene miedo na unda bo ta, splica na un manera nechi , dicon bo no ta tuma parti, pasobra bo no ta apoya maldad, y tambe splica tambe e consecuencia di maldad ora hende no kier stop y arepenti.
Hopi hende ta mira maldad ta tuma lugar of ta tumando lugar na nan trabao y ta sera boca y cana bay pa nan no perde nan trabao, of pa e hefe no rabia cu nan.
Laga nos tur ta na altura cu Dios ta odia maldad, Dios ta odia pica, y segun Proverbionan 6:16 tin seis cos cu Senjor ta odia y e di siete ta abominacion p’E.
Y ta para scirbi cu orguyo of wowonan altanero ta bini na prome lugar,
Sigi pa lenga mentiroso,
Mannan cu ta drama sanger inocente,
Curason cu ta plania maldad,
Pianan cu ta lihe pa corre haci maldad,
Un testigo falso cu ta papia mentira,
y esun cu ta sembra desunion entre rumannan.
Pasobra antes boso tabata scuridad, ma awor boso ta lus den Senjor, cana como yuinan di lus.
Y no participa den e obranan infructifero di scuridad, ma mas bien expone nan.(Efesionan 3:8-11).
Si bo ta na altura cu bo yiu ta hcaiendo algo contra boluntad di Dios, poniendo su mes na peliger y otronan, no tarda pa bise, tuma bo autoridad como mayor, y para locual ta maldad y inhusticia, pasobra Dios mes a duna autoridad como mayor pa bo haci esey.
Laga nos pordona otro y biba na pas cu otro, mescos cu Dios a duna nos oportunidad pa lanta riba, laga nos tambe duna oportunidad na nos prohimo.
Sinceramente, Pastor Marcel Balootje
