Minister di Finansa Geoffrey Wever ta informa cu Collega Aruba financieel toezicht (CAft) a duna conseho positivo riba e di dos UItvoeringsrapportage pa 2025. Manera anuncia den e conferencia di prensa riba 11 di augustus, e di dos “Uitvoeringsrapportage” a wordo entrega na CAft riba 8 di augustus. Cu esaki Aruba a cumpli cu loke ley ta bisa: e di dos uitvoeringsrapportage a wordo entrega na tempo den un termino di maximo 6 siman despues di cada kwartaal.
Segun CAft e di dos uitvoeringsrapportage ta duna un bista positivo. Entradanan di belasting ta mas halto cu a premira. Cu esaki ta yega na un saldo financiero provisional di 364 miyon florin na fin di juni 2025 of 5 porciento di e producto interno bruto. CAft ta indica cu Aruba ta cumpli provisionalmente cu e norma di saldo di financiamiento y tambe cu e norma di gastonan di personal. E porcion di debe di 72 porciento ta keda hopi bao di e caminda di reduccion di debe cu a wordo acorda.
Den e mesun conseho tambe CAft ta indica cu ehecucion di inversionannan ta kedando atras a consecuencia di escasez den e sector di construccion como resultado di crecemento economico persistente, aprobacion laat di e presupuesto, complehidad di algun proyectonan y retonan den e capacidad di ehecucion.
Basa riba e di dos uitvoeringsrapportage, CAft ta constata cu tin espacio adicional den presupuesto pa motibo di meevallers y subutilisacion di inversionnan. Ademas tin surplus proyecta na e fondonan di SVb y AZV. CAft ta recomenda cu e surplus aki wordo uza principalmente pa pago di debe.
E conseho di CAft riba e di dos raport di ehecucion di e presupuesto ta mustra cu Aruba ta riba e rumbo pa cumpli cu e normanan di presupuesto manera ancra den ley. Recomendacionnan di CAft ta di balor agrega pa hunto cu Gobierno na un manera transparante sigui mehora e finansa publico di nos isla segun minister di Finansa Geoffrey Wever.
