Corte di Husticia a trata e caso penal cu Ministerio Publico a cuminsa contra e homber Mericano biba na Aruba, M.L.S. (68). E ta wordo sospecha cu entre December 2022 y 28 Januari 2025, di tabata importa y bende marihuana.
SOLO DI PUEBLO por a compronde cu Fiscal a exigi 12 luna di prison kitando tur e tempo cu M.L.S. ta cera den KIA.
BENDEMENTO DI MARIHUANA
Hues a haci M.L.S. preguntanan, relaciona cu e rapport di Polis. Ta asina cu M.L.S. a bisa Hues cu e no ta bisa nada y ta laga tur cos den man di su abogado mr. Carlo.
Hues a mustra cu segun e “rapport” di Polis, e investigacion a cuminsa door di informacion cu lo tin hende ta importa droga for di Merca. A resulta cu e persona ta M.L.S. Investigacion a mustra cu diferente biaha M.L.S. su nomber a wordo menciona den casonan relaciona cu droga. Tin hende cu a wordo deteni, R., cu a bisa cu el a bin cu marihuana for di Colombia pa bende cu M.L.S. Na December 2023, Polis a detene na aeropuerto un tal P., kende a bisa cu el a trece droga pa M.L.S. Na October 2023 un tal T. a wordo gara na aeropuerto cu mas cu 1 kilo di marihuana, cu tabata destina pa M.L.S. Tambe Polis a yega di detene M.L.S. dos biaha relaciona cu caso di droga. Polis a bay haci investigacion na cas di M.L.S. na Kudawecha y a haya diferente persona den e cas hunto cu M.L.S. A haya tambe 41,7 gram di marihuana. A haya saconan di plastic vacuum. Tur esaki ta indicacion di bendemento di marihuana.
LEGALISA MARIHUANA Y KIA LO TA HOPI MAS BASHI
Hues a mustra cu den Corte M.L.S. no kier bisa nada pero na Polis, M.L.S. a declara cu e ta usa 1 pa 2 sigaria di marihuana pa dia. M.L.S. a bisa Hues, cu e ta huma marihuana hunto cu otronan pero no kier bisa nada mas. Hues a sigui Polis a interoga diferente persona cu ta sospecha cu nan tabata cumpra. E personanan a declara cu nan tabata cumpra for di M.L.S. y cu tin hende ta bende pa M.L.S. Tin hende a bisa cu M.L.S. ta bin cu droga for di Merca. E personanan cu Polis a interoga, a reconoce M.L.S. riba potret.
M.L.S. a bisa Hues cu e tabata usa marihuana y cu Polis a kibra drenta su cas y bay cu tur cos. E tabatin pensa pa biba su periodo di pensioen na Aruba pero awor un amigo ta yud’e pa bende e cas y e bay bek Merca.
Hues a mustra cu Polis a scucha combersacion entre un dama R. y M.L.S. Por a nota cu cada vez M.L.S. tabata bisa Hues cu e no ta bisa nada. Hues a mustra cu Polis a conclui for di e combersacion cu e dama R. y M.L.S. tabata papia di bendemento di droga. Polis ta haya cu M.L.S. tabata instrui R. con mester bende droga y cu R. tabata warda e droga pa M.L.S.
Hues a mustra cu Polis a haya den cellular di un persona cu a wordo deteni na aeropuerto un video di droganan hinca den un caha. Esaki ta e droga cu M.L.S. tabata busca for di Merca.
Na dado momento M.L.S. a bisa Hues cu si legalisa marihuana, KIA lo tin hopi menos hende sera.
FISCAL
Fiscal a bisa Hues cu for di investigacion ta mustra cu M.L.S. tabata importa y bende marihuana. A haci investigacion na cas di M.L.S. caminda a haya 41,7 gram di marihuana. Tambe tin declaracion di 4 hende cu a cumpra marihuana pa un tempo largo for di M.L.S. Fiscal a mustra cu na December 2024 tabatin combersacion entre R. y M.L.S. caminda nan tabata papia di bendemento di marihuana. Riba video por mira claramente cu tabata saca marihuana for di un caha na cas di M.L.S. Fiscal a mustra cu M.L.S. a wordo condena na 2023 y 2024 pa droga. Den un caso, M.L.S. mester a paga 10 mil dollar di boet. Fiscal ta considera cu M.L.S. tabata avisa. Fiscal a exigi 12 luna di prison kitando e 207 dianan, cu M.L.S. ta cera den KIA.
ABOGADO
Mr. Carlo a bisa Hues cu M.L.S. ta desmenti di a importa y posecion di gran cantidad di marihuana. Na opinion di e abogado, e 41,7 gram di marihuana no ta indicacion cu tabata bende den gran escala manera Fiscal ta bisa. E abogado a pidi Hues pa declara M.L.S. liber di importacion y bendemento di marihuana. E abogado a bisa Hues pa condena M.L.S. solamente pa posecion di marihuana. El a bisa Hues cu M.L.S. ta un usador di marihuana pa kita dolor na su curpa. E abogado a splica Hues cu M.L.S. tabata kere cu e tin cancer y tabata usa marihuana pa calma dolor. Na KIA ora M.L.S. a haya dolor, a resulta cu ta un hernia e tin y no cancer. Entretanto a opera esaki, despues di 7 luna sera den KIA. Su plan tabata pa biba na Aruba. Ora Polis a drenta e cas, e portanan no a keda sera. E cas a wordo geplunder. Airconan y hopi cos den cas a wordo horta. El a bende e cas. E abogado a pidi Hues pa duna castigo combina pa asina tin presion riba M.L.S. cu si e kier bin biba na Aruba, e no por haci mesun cos.
Hues a sera tratamento di e caso y a bisa cu e ta bay studia e caso y 12 September lo tin sentencia.
