Awe nos ta sigui cu tratamento di e presupuesto supletorio 2025 y manera nos a bisa durante nos primera tanda, nos ta condena e hecho cu un gobierno cu un surplus di 500 miyon florin NO ta trece alivio pa pueblo cu tanto a ser priminti. Loke nos a mira den e presupuesto supletorio ta cu gobierno a opta pa inverti den infrastructura y edificionan pero NO trece alivio pa cartera di pueblo. Den e presupuesto aki cu tin un surplus di 500 miyon florin, no tin placa pa pensionadonan, no tin placa pa energietoeslag, no tin placa huurtoeslag y sigur NO tin placa pa un miho structura di salario pa docentenan.
Nos ta condena e hecho cu netamente un gobierno cu a haci e promesa pa trece alivio pa cartera di pueblo, awor cu nan tin e oportunidad no a trece ningun alivio pa pueblo. Nos ta mira con ta fiesta y derocha placa di pueblo.
En bes di yuda pueblo ta castiga pueblo.
En bes di yuda pueblo ta introduci medida por medio di aumento di prijs di gas di 35%.
Ta forsa pueblo sigui paga pa remedinan apesar cu AZV tin surplus di mas di 200 miyon florin.
Den tempo di abudancia ta cobra pueblo remedi, pensionadonan, muchanan special, hendenan cu problema cu salud mental.
Ta kita placa di presupuesto pa construccion di cas social.
Nos ta nota cu den e presupuesto aki e salario ‘averahe’ di esnan cu ta traha den Cocolishi, sin open sollicitatie, sin vacatura, sin formatierapport y sin un comision di seleccion ta nada mas y nada menos cu 9.500 florin pa luna. Un bode den e gobierno aki su salario ta 6.000 florin pa luna. Imaginabo, e hendenan cu a haci promesa di politica nobo, esnan cu a haci e promesa cu tur hende lo haya oportunidad igual awe ta abusa di fondonan publico.
Awe ta inventa funcionnan manera diplomatico cultural, district advisor, fotografo ta bira beleidsmedewerker y awe no tin minister di finansas. Ta imposibel cu un minister di finansas por acepta cu un bode ta gana 6.000 florin pa luna.
Den e gobierno aki un bode ta gana mas placa cu un docente. Di e forma aki di berdad nan a bolter cos paso awor a lubida docentenan, a lubida pensionadonan, a lubida personal di cuido y a lubida di trece alivio pa pueblo.
