Awendia tin hopi creencia cu ta aleha hende for di Dios, enbes di hala hende serca Dios.
Tin hopi enganjo y hopi confusion, hopi distraicion cu ta hiba hende den scuridad profundo.
Tur esaki ta trampa di diabel, cu kier pone hende kere cu e no ta exisiti pa asina hende cay den su trampa, y bira su instrument.
Den Mateo 13:37-43 Hesus a splica cu tin yuinan di reino, y yuinan di e malbado, cual ta esnan cu diabel a sembra, mescos cu tur ser humano nan ta hunto riba e mundo aki, awel tin hende cu nan curason ta cu Dios, y tin hende cu ta bao di dominio di e malbado.
Pesey Dios a stima mundo y a entrega su Yiu unigenito pa ken cu lere den dj’E no bay perdi ma tin bida eterna.
Pero manera e palabra di Dios ta bisa cu den e ultimo tempo bofonadonan lo lanta, hendenan cu no tin respet pa Dios , y hasta tin di nan cu no ta kere cu diabel ta existi, mientras cu den tur evangelio Hesus ta menciona existencia di e malbado.
Pasobra ta para scirbi den Mateo 4:1-10 con e diabel a bay tenta Hesus mes den desierto, y purba na ganja Hesus, esey ta pa nos tene cuenta, especialmente cu locual tin para scirbi den e buki di 1 Pedro 5:8 cual ta bisa cu boso adversario e diabel ta cana manera un leon cu ta grunja buscando ken e por devora.
Nos tur ta vulnerabel na un of otro atake di e enemigo, pesey nos tin cu somete nos mes na Dios, resisti e diabel e lo huy for di nos.( Santiago 4:7).
Hende ta purba troce e palabra di Dios, pa asina nan haci locual cu nan kier pa hanja aprobacion terenal, miemtras cu e estilo di bida, y e tipo di conducta cu nan kier hiba, den cielo serca Dios e ta wordo rechasa totalmente.
Pasobra manera Pablo ta bisa cu si Cristo no a wordo lanta, e ora ey nos predicamento lo ta envano.( 2 Corintionan 15:14).
Den e tempo cu nos ta bibando ta un tempo trabahoso, caminda maldad ta aumenta, y caminda hende lo purba tur manera,pa usa triki diabolico pa desvia hende for di e berdad di Dios.
Pesey ta para scirbi pa tur hende sa lo siguiente den Galationan 2:8-9 bisando;
Ma maske nos, of un angel for di cielo,lo a predica na boso un otro evangelio, contrario na esun cu nos a predica na boso, cu e sea maldiciona.
Manera nos a bisa caba, asina mi ta bolbe bisa awor,si cualkier hende predica na boso un evangelio contrario na esun cu boso a ricibi, cu e sea maldiciona.
Ma e Spirito ta bisa claramente cu den e ultimo temponan algun lo cay for di fe, door di paga atencion na spiritonan enganjoso y doctrinanan di demonjo.( 1 Timoteo 4:1).
Den 2 Timoteo 3:1-5 tin mas cu binti caracteristica di hende, cu lo cambia den e tempo trabahoso den cual nos ta bibando:
Hende lo perde amor pa hende,
Hende lo perde respet pa hende,
Hende lo perde respet pa Dios,
Hende lo ta stimado di placer mas cu Dios,
Hende lo ta odiado di loke ta bon,
Hende lo no tin dominio propio, esey ta djis un paar, pero esun cu ta mustra mas cla e diferencia den hende, caminda para scirbi cu hende lo tin aparencia , di ta religioso, pero ta nenga poder di Dios
Evita e sorto di hendenan aki.
Sinceramente, Pastor Marcel Balootje
