Dios no kier pa nos duda, esun cu ta duda no kere cu e por ricibi nada di Senjor, duda ta horta bendicion di hende, y ta stroba hende di mira e grandesa di Dios.
Duda ta trece miedo, y caminda tin miedo cos ta stanca y no tin avanse, pesey nos mester mantene nos bista fiho riba Dios, y no duda, pasobra Dios no kier pa nos duda, pero kere cu E ta capas, pa haci tur locual nos ta pidi den Su boluntad.
Por ehempel ora nos ta duda den un persona , esey ta nifica cu nos no ta confia e persona, ora un tata kier logra algo den cas, pa bienestar di henter su famia, y e famia ta duda cu e por logra, nan ta tranca locual mester bay dilanti, y lo tarda e tata pa yega na e meta pasobra hende cu ta duda no ta coopera.
Si un general ta bay gera y e soldadnan ta duda, e bataya ta keda para, pasobra e general no tin backup di su soldadnan, pasobra nan ta duda, y a keda demostra cu duda ta detene nos relacion cu Dios.
Pedro a bisa Hesus si ta Abo lagami bini serca Bo, Hesus a bise bin, Pedro a sali for di boto y cuminsa cana riba awa, pero ora e mira e olanan y biento cu ta supla e a cuminsa duda, e a kita su bista for di riba Hesus y pone riba e circumstancia, eynan e a cuminsa sink, e a grita Senjor salbami. Y mesora Hesus a saca Su man gare y bise, O abo hende di poco fe, pakico bo a duda. ( Mateo 14:31).
Hopi biaha ora nos kier logra algo den bida, e enemigo ta trece duda den nos, pa nos kere cu nos no por of tin hende ta stroba nos, y mas ainda duda ta cambia nos manera di papia y manera di pensa, duda por trece hasta stress, pero Dios ta bisa pa no duda, pasobra esun cu ta duda. no kere cu e por ricibi algo di Senjor, siendo un persona di curason dobbel. ( Santiago 1;6-7-8).
Duda ta pone hende murmura, locual Dios no kier pa hende haci, pasobra murmuracion ta lanta rabia di Dios, pasobra murmuracion ta mustra falta di confiansa y no ta agradecido na Dios.
Sin fe ta imposibel agrada Dios, pasobra esun cu ta bini serca Dios, mester kere cu E ta, y cu E ta Esun cu ta recompensa esnan cu ta busc’E.( Hebreonan 11:6).
Hesus Cristo ta mescos ayera, awe y pa semper.( Hebreonan 13:8).
Y pasobra Dios no ta cambia, nos no tin mester di duda, den su poder y autoridad, pasobra ora nos kere nos ta engrandece Su nomber y nos lo mira su grandesa, pasobra ora nos fe aumenta,nos ta yega na caminda cu e palabra di Dios ta bisa cu tur cos ta posibel pa esun cu ta kere.( Lucas 9:23-27).
Hopi cos cu hende, no ta logra, no ta pasobra Dios no por haci, pero hende no ta kere suficiente pa move man di Dios, pasobra fe ta poderoso y fe ta move man di Dios.
Fe ta nifica cu Senjor tin tur poder y autoridad, pa cambia cualkier asunto den nos bida,
Pa cambia nos lamento den baile,
Pa kita obstaculo cu ta stroba nos di bay dilanti,
Pa trece claridad den tur asunto,
Pa kibra tur forsa di scuridad treciendo lus den nos bida,
Pa sana tur enfermedad, y pa duna nos pas.
Dios aumenta nos Fe.
Sinceramente, Pastor Marcel Balootje
