Recientemente ehecutivonan di e departamentonan di mercadeo y benta na Tropical Bottling Company, Brouwerij Nacional Balashi, Balashi Beer Experience y Gloria, a atende un charla riba “Public Speaking & Media Cummunication.” Mark-Benson Denz a duna e charla aki na Universidad di Aruba.
Ey a repasa e ultimo tendencianan den formulanan moderno di comunicacion, con pa atende cu media en general y e mensahe cu ta uza ora di comunica na otronan. E charla tabata masha interactivo, pues e participantenan por a haci pregunta y haya splicacion al instante.
Tocante Tropical Bottling Company
Tropical Bottling Company, un subsidiario di MetaCorp, e empresa mas bieu di Aruba, a nace na aña 1948 den Wilhelminastraat, banda di unda awe ta El Gaucho Restaurant. E tempo ey e planta tabatin un capacidad pa yena 10 boter di refresco pa minuut. E planta ta situa awo na Balashi y ta conta riba un capacidad pa yena mas o menos 1250 boter, bleki of boter di plastic pa minuut.
Awendia, separa di Coca Cola, e planta ta produci un cantidad di producto, manera Fanta, Schweppes, Dasani y mas. Tambe a añadi marcanan di bebida, manera Dewars, Bacardi, Grey Goose y hopi mas tambe cu ta resorta bou di nan maneho.
Orguyosamente por menciona cu tur producto di bleki di e liña Coca Cola y Fanta bendi den e islanan ABC ta produci den e planta di Tropical Bottling na Aruba.
Den añanan 90 a lansa Awa, cu a bira asina exitoso, te cu The Coca Cola Company mes a opta pa tum’e over y hacie “Dasani by Awa” …un desaroyo cu Aruba por ta orguyoso di dje!
