Comerciantenan den Caya Grandi ta expresa un sentimiento general di optimismo y confiansa den e direccion cu Gobierno di Aruba a tuma cu e reciente instalacion di e Taskforce “Convivencia: Centronan di Ciudad Sigur y Humano”.
Representante di OBIZ, Elton Arends, a indica cu sector comercial a identifica desde algun tempo e necesidad di accion urgente, specialmente riba tema manera limpiesa y orden den e area.
“Nos ta hopi contento cu gobierno a cuminsa move riba e problematica aki. Esaki tabata algo urgente pa nos sector,” Arends a expresa.
Segun Arends, e iniciativa aki ta crea confiansa y expectativa positivo, specialmente mirando e interes creciente di inversionista den e area di Caya Grandi. “Den e proximo añanan nos por mira un Caya Grandi completamente diferente y renoba,” el a agrega.
Comerciante Solanys Wever-Quintero di Star Fashion tambe a comparti un sentimento di speransa riba e futuro di e area. Despues di añanan di esfuerso, e ta mira cu finalmente tin accion concreto.
“Nos ta mira cu tin apoyo real. Esey ta duna nos mas confiansa pa sigui traha y inverti den e area,” Wever a comenta.
Un perspectiva di experiencia a bin for di ‘Benchi Pick’ di La Moderna, un establecimento cu tin presencia di hopi aña den Caya Grandi. Segun Benchi, e paso cu a wordo tuma awor ta mustra cu e biaha aki tin un direccion serio pa mehora e situacion.
“Mi ta kere cu si nos traha hunto, nos por mantene Aruba limpi y mehora nos centro di ciudad,” el a expresa, resaltando e importancia di esfuerso conhunto entre comunidad y autoridadnan.
E reaccion di comerciantenan ta mustra un cambio di actitud: di preocupacion pa speransa, y di stagnacion pa movemento.
E taskforce nobo, mira como un paso concreto pa logra un centro di ciudad cu ta mas limpi, mas sigur y mas digno, respetando e identidad di Aruba mientras cu ta habri porta pa un futuro mas dinamico.
