Den un suceso cu a cambia e rumbo di e conflicto na Medio Oriente, a wordo confirma e morto di e maximo lider di e Republica Islamico di Iran, Ayatollah Ali Khamenei. E noticia a keda ratifica pa fuentenan oficial despues di un atake militar masivo coordina pa Estados Unidos e Israel.
E lider religioso y politico, kende tabatin e ultimo palabra den tur asunto di estado na Iran for di aña 1989, a perde su bida den locual Presidente Donald Trump a describi como un “operacion di exito sin precedente”. Segun e prome informenan, Khamenei tabata hunto cu varios alto mando di e jefatura militar na momento di e agresion.
Un golpi mortal na e mando Irani
E noticia di su morto a wordo confirma pa e cadena Fox News, caminda Presidente Trump a declara cu “48 lider a cay di un solo bes”. E fayecimento di Khamenei ta representa e caida di e figura mas poderoso di e nacion persa, lagando un bashi di poder den un momento di guera habri.
Merca a duna di conoce cu e atake a destrui tambe gran parti di e infraestructura di mando naval y militar di e pais. “E ta avanzando rapidamente,” Trump a manifesta, señalando cu e inteligencia Mericano tabata sa exactamente e posicion di nan obhetivonan.
Reaccion Internacional
Mientras cu na Washington e ambiente ta uno di triunfo militar, na e capital Tehran reina un silencio absoluto y incertidumbre total. Analistanan internacional ta premira un destabilisacion den e region, mirando cu Ali Khamenei tabata e simbolo di e resistencia Iraní contra Occidente pa mas di tres decada.
E morto di e Ayatollah, kende tabatin 86 aña di edad, ta marca e fin di un era. Te asina leu, no tin claridad ken lo por sucede su persona den e puesto di Lider Supremo, considerando cu hopi di su conseheronan mas cerca tambe a fayece den e mesun atake.
