San Nicolas ta wak… y ta scucha. Aruba ta wak… y ta scucha.
Apenas despues cu AVP crea un posicion “Diplomatico Cultural” pa un yiu di AVP, awor nos ta mira cu FUTURO no a keda atras. Un otro puesto a wordo inventa pa un miembro fiel di FUTURO. Rondel C.L. Heyliger, number 8 riba lista, a keda oficialmente nombra como “District Advisor di Sanicolas pa projecto” pa Ministerio di Finanza, Economia y Sector Primario, cu un rol como “Diplomatico Comercial di San Nicolas”.
Pero kico realmente ta pasa aki? Un puesto pa Rondel, pero pa kico?
Rondel no ta un desconoci den mundo politico. E ta un hende inteligente, si.Segun henter Aruba sa, Rondel tabata e persona tras di e multiple permiso di auto di huur, kende tabata core tras di ex Minister Chris Romero, pa cual despues a join Partido Raiz, pa sigui pusha pa haya permisonan di huur auto. Pues, Rondel no ta basila ora e wak oportunidad. Su cambio pa partido Futuro, a mehora su situacion mesora: awe e tin un salario barbaro di Gobierno, sin un open solicitatie, manera e partido a priminti.
Y segun 24ora: “E lo tin e rol pa pusha proyectonan pa San Nicolas…”
Kico esaki ta nifica?
Proyecto? Pa ken? Unda e plan ta ? Ta ki proyecto Gobierno tin den mente ?
7000 mil florin pa un posicion inventa
Segun fuente administrativo, e sueldo pa e puesto di Rondel ta rond di e suma di un Staatssecretaris: Fls 7,500 + 25% di compensacion extra. Un puesto sin desripcion cla di trabou, sin transparencia, sin merito.
A lubida Hilario Donker ?
Mientrastanto, e berdadero voz di San Nicolas, Hilario Donker, un activista cu a dedica su bida voluntariamente pa e bario, nunca a haña ni un chance pa solicita. Ni un entrevista. Ni un reconocimiento.
Futuro ta practicando e mesun patrosinio di AVP cu tanto el’a critica
Mihor bisa:
Futuro a subi cu un mensahe anti-patrosinio politico. Anti-favoritismo. Anti-puesto inventa. Cu Open Solicitatie.
Votadornan di FUTURO a cay e promesanan bunita: “E ora di cambio por fin yega.”
Pero awe nos ta mira mesun cos “ta pa nos, no pa nan”, mes mentalid di Avp. Esei ta traicion di confiansa popular.
Pregunta pa Pueblo
Pakick ta inventa puesto pa miembro di partido? Unda e evaluacion di calacidad ta, di merito? Ki proyectonan lo Rondel pusha pa San Nicolas pa merece e salario aki?
Pueblo no ta na soño:
Pueblo ta lanta. Nos a cansa cu partidonan cu progreso ta pa nan mes.
Futuro por laga sa cu Rondel lo cumpli, pero duna prueba ta otro cos:
San Nicolas no mester di un diplomatico comercial, bashi sin contenido. Sanicolas mester di hendenan real cu ta traha, no oportunista politico.
