A cuminsa interoga testigonan di Otmar Oduber den caso Flamingo
ORANJESTAD – Awe mainta a cuminsa cu e interogacion di e testigonan di Otmar Oduber na Hues Comisario. Esaki ta relaciona cu caso Flamingo caminda na November 2023, Hues a honra e peticion di abogado mr. Carlo, pa scucha testigonan na Hues Comisario.
SOLO DI PUEBLO por a compronde cu ayera no a sigui cu e interogacion di Parlamentario Marisol Tromp. A pospone esaki pa dia 20 di Juni 2024.
MARISOL TA WORDO INTEROGA
Ta asina cu awe, e promer testigo tabata Parlamentario Marisol Tromp. Por a compronde cu e interogacion no a tuma lugar pasobra Parlamentario Marisol Tromp a viaha pa trabao. Hues Comisario tabata na altura di esaki y a keda palabra cu dia 20 di Juni 2024, e interogacionmester tuma lugar.
Ta asina cu Hues den su decision di “regie zitting” ta mustra cu ta importante pa scucha Marisol Tromp como testigo. Por a compronde cu hopi di e acusacionnan pisa entre otro labamento di placa, a wordo poni un banda.
DIRECTORNAN LO WORDO INTEROGA
Den combersacion cu Otmar Oduber, el a duna di conoce cu Hues a honra su peticion pa asina trece claridad den tur e acusacionnan cu no tin base. Ta asina cu Diahuebs 6 di Juni 2024, e director di DIP, e director di Serlimar y e director di DOW lo wordo interoga dilanti Hues Comisario. Esaki relaciona cu e acusacion cu Otmar Oduber lo a forza nan pa tuma hende na trabao.
LO INTEROGA MIEMBRONAN DI LANDSRECHERCHE
Den e lista di 31 testigo tambe ta aparece 3 miembro di Landsrecherhce cu lo a haci investigacion den caso Flamingo. Por corda con a bay haci investigacion na cas di Otmar Oduber y tur esaki lo bira topico di interogacion.
MIEMBRONAN DI RST TAMBE LO WORDO INTEROGA
Por a compronde di Otmar Oduber cu algun miembro di RST (Recherche Samenwerkings Team) tambe lo wordo interoga den trascurso di e simannan cu ta bin.
Tin henter un schedule traha pa e interogacionnan na Hues Comisario cu lo mester sosode entre Juni y Augustus 2024.
