A haci un yamada pa studiante bin bek Aruba despues di nan estudio: Prome Minister Mike Eman ta felicita e graduadonan di Colegio Arubano

Prome Minister Mike Eman a participa diahuebs anochi na ceremonia di graduacion di Colegio Arubano na Renaissance Convention Center, unda e a felicita tur e graduadonan cu nan logro y a comparti un mensahe di inspiracion pa e siguiente etapa di nan bida. Den su discurso, e Prome Minister a expresa cu e ta orguyoso di e hobenan cu, despues di hopi aña di dedicacion, esfuerso y perseverancia, a logra un importante meta academico. “E anochi aki boso lo corda pa semper. Ta un momento cu boso ta celebra tur e sacrificionan, e nochinan di estudio y e esfuerso continuo cu a haci boso yega na e punto aki,” segun Prome Minister Eman. 

E a reconoce cu pa hopi di e graduadonan lo sigui un etapa nobo, posiblemente den exterior, unda nan lo conoce otro cultura, haci experiencia nobo y sigui desaroya nan mes profesionalmente. “Ora boso subi avion pa bay studia leu for di cas, lo ta un experiencia nobo. Pa algun lo tin nostalgia di cas, pero semper keda concentra riba e meta grandi cu boso tin: termina boso estudio y bira e profesional cu boso kier ta.” Durante su mensahe, e Prome Minister a enfatisa cu Aruba tin mester di e talento y e conocemento di su hobenan. E a menciona cu, aunke e mundo ta ofrece hopi oportunidad, Aruba semper lo spera nan regreso. “Ora boso haya e diploma final di e profesion cu boso a scoge, corda cu tin un isla chikito cu mester di boso talento y conocemento. Aruba ta spera boso un dia bek pa hunto sigui construi un futuro miho pa e siguiente generacionnan.” Como ehempel personal, Prome Minister Eman a conta cu e mes tin sobrino y sobrina cu actualmente ta studia na Hulanda. Cada biaha cu nan bishita Aruba, e ta anima nan pa un dia regresa y pone nan conocemento na servicio di pais Aruba.

Na final di su discurso, e Prome Minister a invita e graduadonan pa disfruta plenamente di e momento special di graduacion, sigui persigui excelencia den nan estudio y carera, y nunca lubida cu Aruba semper lo ricibi nan cu brasa habri. “Celebra e anochi aki, disfruta di e momento, prepara pa tur e exito cu ainda ta spera boso. Pero corda semper cu tin un Aruba cu lo kier mira boso bek aki. Masha danki, hopi exito y cu Dios bendiciona boso.”