Fin di luna di februari 2025, altocomisario Arnhem a yama tres colega policial pa presenta na Warda di Polis Santa Cruz pa honranan personalmente pa nan accion relampago y eficaz.
Durante di Parada di Jouvert Morning a sosode un tiroteo net patras di un Julio’s bar na San Nicolas. Na e momento ey tabata tin un multitud grandi di persona gosando di Jouver Morning y pa colmo e parada tabata pasando na momento di e tiroteo.
Aki tabata na unda cu tres agente policial di fam Nicholson, de Castro y Dayton a drenta den accion. Tabata momento nan crucial na unda den un par di seconde mester a actua. Den nan accion policial pa nan sorpresa e sospechoso tabata tin un arma di candela den su man y tabata den direccion di e agente policialnan menciona. Den un forma tactico, eficaz, veraz y cu firmesa a sa di actua y a pone sospechoso na vloer y na boei mesora.
Mirando e riesgo grandi di multitud di hende presente nan actuacion rapido y detene e sospechoso despues di e tiroteo ta algo di aprecia.
Pa motibo di esaki altocomisario Arnhem ta mira e importancia di duna balor y honra e tres agente policialnan aki cu e titulo di mas halto di gratitud cu ta e “oorkonde”. Cu e documento aki ta pone un balor extra den nan carera policial.
Arnhem ta gradici e tres coleganan aki pa nan actuacion y ta duna un balor agrega na nos Cuerpo Policial Aruba pa asina di e forma aki sigui mantene nos comunidad sigur y trankil!
