E homber Venezolano J.M.C. (42) y e homber Colombiano C.Z.C.(43), a presenta den Corte pa e caso penal cu Ministerio Publico a cuminsa contra nan. Nan ta wordo acusa di a exporta algo mas cu 9 kilo di cocaina pa Hulanda.
SOLO DI PUEBLO por a compronde cu apesar cu C.Z.C. ta desmenti tur cos, Fiscal ta haya C.Z.C. y J.M.C. culpabel di exportacion di cocaina y a exigi 3 aña y 6 luna di prison pa cada un.
DROGA DEN VERF
E acusacion cu Fiscal a presenta contra J.M.C. y C.Z.A. ta cu entre 1 Januari 2025 y 25 Februari 2025, conhuntamente nan a exporta, transporta y tabata den posecion di un lote di cocaina.
Hues a bisa cu segun e raport di Polis, dia 3 April 2025 un cacho antidroga a reacciona riba e cahanan di instrument. A pisa e cahanan y esaki a resulta 91 Kilo. Despues a haci investigacion y a constata cu e cocaina tabata mescla den e verf y esaki a keda calcula na 9077 gram di cocaina.
UN SOSPECHOSO TA ADMITI
E homber J.M.C. a pidi Hues pordon pa loke el a haci. El a bisa cu door di necesidad, el a hay’e obliga di haci esaki. El a bisa cu su mama tabata malo y tabatin mester di tratamento. El a hypoteca cosnan pa asina yega na e placa y mester paga bek. Door di esey, un persona cu e conoce na Colombia a bis’e cu e tin un trabao pa haci. J.M.C. a bisa Hues cu el a hinca cocaina den verf pa verf e cahanan di instrument. Segun J.M.C. en total tabata 4 kilo di cocaina. El a bisa cu e persona na Colombia a bis’e cu e falta placa y el a manda 5 mil dollar pa manda e cahanan. El a bisa cu e ta yuda e persona trece carganan for di Colombia y na Aruba ta destribui esakinan. E intension tabata pa e cahanan di instrumento bay Hulanda. A bay hiba e cahanan di instrumento pa Master Cargo pa exporta. Eynan J.M.C. a duna nomber falso y a usa un pasaporte falso. E intension tabata pa manda e cahanan pa un tal B. na Hulanda. E carga di Colombia a yega Januari 2025 y J.M.C. a warda e cahanan unda e tabata keda na cas di C.Z.C. cu ta su amigo.
SOSPECHOSO TA NENGA
Hues a puntra C.Z.C. kico su participacion den esaki ta. Segun C.Z.C. e no tin nada di haci cu esaki. El a bisa Hues cu su fayo tabata, confia den J.M.C. y huur J.M.C. un cuarto. El a bisa cu nan conoce otro pa 20 aña. Segun C.Z.C. el a yuda J.M.C. como amigo y a wordo usa door di J.M.C. Na yoramento el a bisa Hues cu un anochi, 20 agente di Polis a bin na su cas y maltrat’e, su yiunan y hasta su mama. Un agente di droga a grit’e cu e ta un hefe di un organizacion grandi di droga. C.Z.C. ta insisti cu e no tin nada di haci cu droga.
Hues a bisa cu tin circumstancianan cu ta mustra den direccion di C.Z.C. Hues a mustra cu J.M.C. a declara na Polis cu el a wordo instrui door di C.Z.C. pa haci cosnan. Hues a bisa cu segun J.M.C., ta C.Z.C. a yud’e falsifica e pasaporte. C.Z.C. a reacciona y bisa cu un dia ora nan tur tabata comiendo na cas, J.M.C. a bin y bisa cu el a haya trabao na RIO pero e mester di un identificacion. El a bisa cu e tin pasaporte y mester pone su potret aden. Segun C.Z.C., el a pidi su yiu homber, cu ta bon den computer, haci esey pa J.M.C. C.Z.C. a sigui bisa cu despues J.M.C. a usa e pasaporte falso aki na Master Cargo. Segun C.Z.C., e no tabata sa cu J.M.C. a bay usa e pasaporte pa haci algo asina.
Hues a bisa cu J.M.Z. a duna diferente declaracion na Polis. Door di esaki, Polis tabata pensa cu ta C.Z.C tabata dirigi J.M.Z. Ta asina cu nan tin 200 dia encarcela relaciona cu e caso aki. J.M.C. tabata kedando ilegal na Aruba.
FISCAL A EXIGI 3 AÑA Y 6 LUNA DI PRISON
Fiscal a bisa Hues cu 3 April 2025, e caso a cuminsa ora cu na Master Cargo, cacho anti droga a reacciona riba cahanan di instrument. 8 caha di instrumento tabatin verf di cocaina y nan a pisa 9150 gram. Despues di calculacion a saca afor cu e verf cu cocaina lo ta 9077 gram. Fiscal a mustra cu esun cu e adress di esun cu a manda e carga lo tabata e dama J.T. A detene un homber D. como esun cu a manda e carga pero el a bisa cu ta J.M.C. E intension tabata pa manda e carga Hulanda. E cahanan lo mester a bay pa un tal B. na Hulanda.
Fiscal a mustra cu C.Z.C. dos biaha a bay Master Cargo hiba J.M.C. Fiscal ta haya cu e droga ta di C.Z.C. y J.M.C. Fiscal a sigui bisa cu J.M.C. a bisa cu un amigo di Colombia a manda e cahanan y ta C.Z.C. a bay busca e cahanan y hiba nan na su cas. El a bisa cu C.Z.C. a bisa su yiu homber pa traha un pasaporte falso pa J.M.C. cu potret di J.M.C. Ta C.Z.C. a percura pa pone nomber di esun cu ta manda e carga y esun cu ta ricibi e carga na Hulanda. Fiscal a mustra cu ora Polis a bay pa detene C.Z.C., el a tira su cellular den tanki di toilette den baño.
Fiscal ta haya cu J.M.C. y C.Z.C. ta complice di exportacion di cocaina. Pa cu e castigo, Fiscal a bisa cu e ta tene cuenta cu ta promer biaha cu nan ta cay den man di husticia. Fiscal ta haya cu nan a organiza traficacion di droga pa Hulanda. Fiscal a exigi 3 aña y 6 luna di prison pa cada un. E droga mester keda destrui. E cellular y placanan di C.Z.C. mester keda confisca.
Hues despues di a scucha defensa di abogadonan, a sera tratamento di e caso y a bisa cu 9 Januari 2026 lo tin sentencia.
