Diahuebs mainta, despues di firma di un Memorandum of Understanding (MoU) cu FCCA pa revitalisa e barionan cu casnan social, Prome Minister Mike Eman a duna continuidad na su mision pa reforestacion y proteccion di naturalesa. Den un acto simbolico, e mandatario a planta un mata di Pal’i Sia Cora net dilanti di e edificio di MFA Noord, hunto cu representantenan di Fundacion Ban Lanta y Planta.
E acto di awe ta parti di un plan strategico y ambicioso pa restaura e naturalesa di Aruba, inspira pa e recien rapport “Aruba 2050” conduci pa Universidad di Wageningen. E estudio aki ta indica cu pa por enfrenta e retonan climatico y sostene nos desaroyo, Aruba mester inverti den proteccion di biodiversidad, reforestacion y uzo mas eficiente di nos tereno- y recursonan natural. E resultadonan di e estudio aki ta sirbi como guia pa Prome Minister den su maneho pa naturalesa.
Desde inicio di Gabinete AVP-Futuro, a cuminsa cu e mision ecologico hunto cu Aruba Conservation Foundation y Fundacion Ban Lanta y Planta y a planta un cantidad di Mangel Blanco y Fofoti den Franse Pas, y cu bishita recien di Prome Minister Hulandes Dick Schoof, a planta un mata di Wayaca na Fort Zoutman. Awe, e esfuerso a sigui na MFA Noord, enfatisando cu tur bario mester ta parti di e renobacion ecologico.
Gobierno AVP-Futuro ta compromete pa fortifica resiliencia di nos isla pa e impacto climatico y ta traha pa proteha nos biodiversidad y recursonan natural a largo plaso. Reforestacion no ta solamente un acto ambiental, pero ta un necesidad urgente.
