Den Corte di Husticia, Hues a bay pa trata e caso penal cu Ministerio Publico a cuminsa contra e homber E.B.C., acusa di intento di mata. Sinembargo, abogado a pidi Hues pa pospone e caso.
SOLO DI PUEBLO por a compronde cu ta acusa E.B.C. di a hinca e dama E. diferente biaha cu un cuchiu den garganta. Abogado mr. Arends Marchena a pidi Hues cu e kier pa psychiater evalua E.B.C., kende a bisa cu e no ta corda nada di loke el a haci.
HINCA DAMA CU CUCHIU NA GARGANTA
Den sala di Corte tabata presente famianan di e sospechoso E.B.C. y tambe e victima, e dama E., tabata presente. E acusacion cu Fiscal a presenta contra E.B.C. ta cu riba 11 Februari 2026, E.B.C. a purba mata e dama E. Fiscal a bisa cu E.B.C. a hinca e dama E. diferente biaha cu cuchiu den garganta.
ABOGADO KIER INVESTIGA SOSPECHOSO
Abogado mr. Arends Marchena a pidi Hues pa pospone e caso pasobra e kier mas investigacion. E abogado a bisa Hues cu e kier investigacion psychiatrico. E abogado a bisa cu E.B.C. no ta corda nada di loke a sosode. Tambe e abogado a pidi Hues pa interoga e homber A.B. kende a presenta na e cas net despues di e incidente. E abogado ta kere cu A.B. lo por splica kico tur el a mira y e situacion emocional di E.B.C. E abogado a pidi Hues pa e video di e incidente, cu a graba riba camera di seguridad.
Fiscal a bisa Hues cu e no tin problema cu video. Pa loke ta investigacion psychiatrico, Fiscal a bisa cu e no tin nada contra. El a sigui bisa cu e no tin nada contra pa scucha A.B.
CASO POSPONE
Hues a bisa cu e ta aproba e peticion di abogado mr. Arends Marchena, pa scucha A.B. riba e situacion emocional di E.B.C. Tambe e investigacion psychiatrico. Hues a pospone e caso pa 4 September 2026 pa 10.30 di mainta. Hues a puntra e victima E. si e lo bay haci demanda di daño. E victima a bisa Hues cu e no ta bay haci demanda di daño pero si kier haci uso di su derecho di hiba palabra. Hues a bisa cu e ta manda e caso pa Hues Comisario interoga A.B.
