Durante un reunion ameno, Minister di Husticia y Asuntonan Social Sr. Rocco Tjon, a ricibi presentacion pa loke ta e plan multi-anual pa 2022-2026 di CEDE Aruba. Presente na e reunion aki tawata director di CEDE Aruba Sr. Daniel Tecklenborg, como tambe ex-Gobernador di Aruba Sr. Fredis Refunjol, kende actualmente ta forma parti di e hunta di maneho di CEDE Aruba. CEDE Aruba, a haci un estudio nacional, caminda a haci un encuesta di satisfaccion di cliente entre 69 diferente organisacion cu tin un relacion directo cu CEDE Aruba. Tambe a haci un consulta cu 78 stakeholders consistiendo di diferente NGO’s, socionan di financiamento como tambe un “sounding board”. A base di e estudio aki a logra deduci cuater punto di enfoke a largo plaso, cual a keda presenta den e plan multi-anual.

Actualmente, CEDE Aruba ta wordo caracterisa como un di e organisacionnan di mas grandi na Aruba, trahando riba e bienestar social y socio-economico di nos comunidad. CEDE Aruba a sa di posiciona nan mes, como e organisacion di financiamento di mas grandi den nos comunidad pa proyectonan den diferente areanan manera: vecindarionan y comunidad, individuonan y famianan, muchanan y hobennan, adultonan mayor, personanan cu limitacion, gruponan vulnerabel y ta yuda reenforsa diferente NGO’s. E mision di CEDE Aruba ta pa promove e union di personanan y recursonan pa un desaroyo sostenibel. Pa e motibo aki a restructura e strategianan pa traha na un manera mas eficiente y pa enfoca riba solucionnan duradero. 

Bisando esaki, for di e encuesta cu a wordo haci entre e diferente socionan y gruponan clave den comunidad, a saca afo cuater punto di atencion cu lo bay enfoca riba dje a largo plaso. Loke cu kier logra cu e resultado di e cuater puntonan aki ta pa crea igualdad den bienestar entre individuonan, famianan y comunidad. E prome punto ta enfoca riba crea organisacionnan mas fuerte, dedica, colaborativo y alinea cu e necesidadnan di nos comunidad. E di dos punto ta enfoca riba ciudadanonan mas involucra y podera, e tercer punto ta enfoca riba e aumento di programanan di prevencion pa nos comunidad y mehoracion di e bienestar di e gruponan vulnerabel. E di cuater punto ta enfoca riba aumentacion di e bienestar di famianan y di e sistema solidario. Bou di cada punto, tin un lista di accionnan cu mester wordo tuma pa yega e obhetivo, di cual CEDE Aruba lo sigui boga p’e y traha conhuntamente cu stakeholders y comunidad pa logra haci esaki.

Por ultimo, e Mandatario a expresa di ta sumamente contento cu e resultadonan di e estudio cu a wordo haci pa CEDE Aruba y ta cla pa traha cu bista riba futuro a base di e plan multi-anual cu a keda presenta, cual ta cuadra cu e obhetivonan di Ministerio di Husticia y Asuntonan Social. For di Ministerio, lo aloca fondonan pa yuda reenforsa esaki. 

LEAVE A REPLY

Please enter your comment!
Please enter your name here