Desde luna di augustus Aruba ta conoce un comandante nobo na Marinierskazerne, esta Luitenant-kolonel T.A.H. van Wijk. Parti di su introduccion na nos isla ta conoce Aruba su Hospital y pues recientemente ela bishita HOH pa sa mas tocante cuido di salud na Aruba, ki servicio tur por ofrece, su desaroyo y kico tur marinierskazerne y nan famia por spera di Hospital na Aruba.
Durante e bishita Comandante van Wijk, Adjudant A. van Hofwegen, Luitenant ter Zee eerste klasse mr. C.J. Hogenelst y Majoor arts Drs. Ilse Oud a haya un recorido na departamento di Emergencia, Bloedbank, ICU, LabHOH y Botica di Hospital. Ademas a papia tocante inovacion y e deseo di Hospital pa inverti den sostenibilidad.
A ricibi splicacion na departamento di emergencia tocante tratamentonan di trauma, kico tur ta posibel kinan na Aruba y kico ta pasa ora mester manda un persona afo. Tambe na Bloedbank a splica e proceso di bira donante, kico ta pasa cu e sanger y cuanto donante falta pa tin suficiente representacion cu ta necesario pa e poblacion di Aruba. Na ICU a mira camber di pashent y con e coleganan por cuida un pashent cu e aparatonan disponibel. Ademas a papia tocante e diferente operacionnan cu ta posibel na Aruba. Na LabHOH e delegacion por a mira con ta yega na un diagnosis cu ta esencial pa detecta y asina aporta na trece solucion sea pa medio di antibiotica of otro tratamento pe pashent. Tambe a splica di e diferente departamento cu ta resorta bou di LabHOH. Por ultimo a pasa un rato na Botica di Hospital unda a papia tocante nan funcion y tarea den Hospital pero tambe pa algun pashent cu tin mester di cierto tipo di remedi cu solamente por haya na HOH.
E bishita a clausura cu un reunion cortico unda a combersa riba varios topico. Jacco Vroegop, director di Hospital, a conta cu a trece dilanti algun di e retonan di cuido na Aruba ademas di e retonan mundial cu tin influencia grandi riba nos Hospital. Esencial den esaki ta cu colaboracion ta importante pa pais Aruba y cu Hospital hunto cu Marinierskazerne por haci hopi pa nos comunidad. No solamente ta importante pa yuda otro y pa kazerne asisti durante calamidad pero tambe aporta na e bienestar general sea pa habitante, turista y tambe esnan indocumenta. Director Jacco Vroegop ta spera cu pronto Marinierskazerne ta bin cu nan open dag atrobe y como famia “hunto nos por siña di otro, intercambia ideanan y brinda sosten”.
Comandante van Wijk a comenta cu e ta sinti’e ‘welkom’ na Aruba y cu ya ela gusta masha mes su prome dos lunanan riba nos isla. Pa loke ta hospital e ta haya cu ta masha moderno y bunita, cu personal cordial cu por brinda cuido no solamente n’e militarnan, pero tambe n’e famia cu por acudi na hospital y cu e tin confiansa den e instituto pa brinda cuido.
E Comandante y su delegacion a keda impresiona y tempo no tabata suficiente pa mustra tur loke tin na Hospital. Hunta di Directiva ta spera cu por tin un bishita mas pa asina tambe pasa cerca otro departamentonan esencial den HOH. Por mira bek riba un bishita fructifero y positivo pa HOH y Marinierskazerne.
