Durante e foro di atleta cu a wordo organisa door di e “Aruba Athletes’ Commission” (AAC) algun siman pasa a tuma luga un tayer di nutricion deportivo specifico pa atletanan local. Aki hoben profesional Edric Magalona di “ELEVA Physiotherapy & Performance Aruba” cu ta fisioterapista ademas di un profesional den tema di nutricion, a prepara un sesion hopi interesante cu a duna diferente “tips” cu tur atleta por usa. Ademas di ta labora den e mundo deportivo, Edric ta un atleta di rendimento cu ta competi den e deporte relativamente nobo di “streetlifting”, cual tambe ta conta cu diferente categoria di peso como cualkier deporte di combate of hisamento di peso. Banda di esaki, Edric ta haci diferente evento di coremento di larga distancia, cual ta dune diferente oportunidad propio pa por pone den practica locual e ta comparti den e area di nutricion.
Durante e tayer, a comparti hopi conocemento di no solamente e parti fundamental di nutricion, si no tambe diferente ehempel relevante cu e hobennan por compronde mas facil. Durante e discurso di Edric a splica e importancia di come corectamente a base di e tipo di entrenamento cu bo ta haci, ademas di e importancia di “hydration”. Hopi enfasis ta con importante e ta pa “fuel” bo mes corectamente pa por duna e miho esfuerso durante entrenamento y competencia. Pa finalisa, e papia di e importancia di recuperacion a traves di nutricion y drumi bon.
Comite Olimpico Arubano (COA) ta gradici Edric pa e charla interactivo cu sigur a logra hala atencion di e hobennan presente.
