A.T.A. a ricibi bishita di studiantenan di unidad di Hospitalidad y Turismo di EPI.

Como parti di un iniciativa di EPI pa studiantenan siña y conoce diferente tipo di trabao, A.T.A. a ricibi bishita di 12 studiante di e unidad di Hospitalidad y Turismo. Nan a ricibi presentacion di diferente miembro di e ekipo di mercadeo di A.T.A. pa asina nan por a haya un miho bista di loke A.T.A. ta haci.

Marisol Sanchez Maldonado; ‘PR & Corporate Communications Specialist’ a duna e studiantenan un presentacion di e rol di A.T.A. den nos turismo como tambe con e organisacion ta hinca den otro y kico e obhetivonan di A.T.A. ta, enfocando no solamente riba e area di mercadeo- tambe riba e area di producto.  

Sjeidy Dijkhoff-Feliciano; ‘Communications Manager’ a splica mas di su trabao, kico ta ‘PR’, ki inciativanan di ‘PR’ A.T.A. ta haci uzo di dje y tambe a mustra e studiantenan diferente iniciativa cu a wordo uza den ultimo añanan y kico esaki a nifica pa Aruba. 

Jerusha Rasmijn; ‘ACB Conferences & Events Manager’ a splica e studiantenan kico e ta haci na A.T.A., e diferente tipo di gruponan cu Aruba ta ricibi y enfoca riba dje como tambe e balor agrega di e gruponan aki pa nos turismo. 

Marylin Feliciana; ‘Branding Specialist’ a presenta na e studiantenan kico e ta haci diariamente como tambe kico ‘branding’ ta, cua ta e elementonan di A.T.A. su branding y a finalisa mustrandonan un video di con ta crea contenido pa campañanan di mercadeo, manteniendo na e reglanan di ‘branding’. 

Jennifer Richardson; ‘Digital Content Specialist’ a conta studiantenan ki tipo di contenido e ta uza riba e website aruba.com y riba e blog di e pagina aki. Jennifer a splica studiantenan tambe e importancia di uza palabranan specifico pa asina wordo reconoci ora ta haci buskeda riba Google y Bing. 

Rayon Koolman; ‘Digital Specialist’, a mustra studiantenan algun ehempel di kico e ta haci tur dia y a splica e tipo di contenido cu e ta traha cu ne riba Facebook, Instagram y Twitter.  Por ultimo a splica con ta haci uzo di elementonan di ‘branding’ pa mantene consistencia den e contenido cu ta wordo comparti.

Na final di e presentacionnan dos stagiarie di EPI actualmente na A.T.A., Erika Hincapie y Luisa Arcila, a haci e studiantenan diferente pregunta, basa riba locual nan a siña na A.T.A. E top 5 contestanan a ricibi un premio y tur participante a ricibi algun di A.T.A. su articulonan promocional. 

Pa A.T.A. ta sumamente importante pa por tin encuentronan manera esun aki pa asina por informa studiantenan kico A.T.A. ta haci, pero tambe pa conecta y inspira e futuro generacion di turismo na Aruba.