Cu un representacion di 9% di cantidad di turismo pa Aruba, A.T.A. y AAA ta sigui traha riba e mercado di Europa conhuntamente cu socionan clave. E continente di Europa a recupera cu 95% na 2022 compara cu 2019 y meta ta pa sigui desaroya e mercado aki na 2023, den linea cu strategia di diversificacion.

Durante transcurso di siman A.T.A. a reuni cu mutipel socio existente como tambe socio nobo na ITB na Berlin, como tambe cu socionan na Hulanda. Un di e reunionnan aki tawata cu KLM, un di nos socionan di mas grandi na Europa.

Pa e reunion tawata presente Bas Gerressen- Director di KLM Hulanda, Marjolein Kesselaar- Product & Partnership Manager di KLM, Ronella Croes- C.E.O. di A.T.A., Sanju Luidens-Daryanani- C.M.O. di A.T.A., Tirso Tromp- Area Director Europa A.T.A.,Jaap Ellis- Sales and Marketing Manager Europe A.T.A. y Jo-Anne Meaux-Arends- Aviation Business Development Executive di AAA.

A para keto na un 2022 record pa e mercado Hulandes (+8% compara cu 2019) y un bon aña pa e mercado di Europa. Ta mira e demanda pa Aruba a base di “bookings” y campañanan efectua hunto cu KLM.

Cu recuperacion di e mercado Asiatico, KLM ta expande capacidad pa e continente aki. Como tal a reduci capacidad riba diferente ruta, mirando tambe cu ainda e aerolinea no ta operando cu e mesun cantidad di capacidad cu el a opera cu n’e na 2019. KLM lo sigui enfoca riba recuperacion completo (opera na 100% capasidad compara cu 2019) pa medio di e.o. sigura e personal necesario -cu falta na es momento aki. Esey ta un reto cardinal.

No obstante demanda cu ta existi pa Aruba, lo reduci algo di e capacidad na 2023. Esaki pa Aruba y Boneiro, despues di a reduci esaki pa e isla di Curacao aña pasa. Lo sigui traha di cerca cu KLM pa captura oportunidadnan ora esaki presenta nan mes, y pa upgrade capacidad – pa medio di avion mas grandi – ora por. Esaki ta intencion pa restante di e aña aki tambe, cual a wordo confirma.

Cu servicionan di Ving y British Airways, y contando cu vuelo di TUI for di Hulanda, ta sigui traha riba e region Europeo. Un region cu por cierto ta haci uzo tambe di nos aerolineanan Mericano tambe, unda ta bula via Merca pa Aruba. Hopi biaha combinando 1 siman Merca y 1 siman Aruba. Esaki ta practica comun por ehempel pa e mercado Italiano.

LEAVE A REPLY

Please enter your comment!
Please enter your name here