Un situacion tenso y politicamente delicado a surgi den gabinete actual, cu ta pone Minister Geoffrey Wever den un posicion comparabel cu esun di Pontius Pilatus: labando su man mientras e conflicto interno ta creciendo. E caso ta regarda su colega di gobierno, Mike de Meza, y un disputa serio riba un abogado for di Curacao contrata pa representa Departamento di Impuesto den un caso sumario.
E problema a bira publico ora Mike de Meza a descubri cu Geoffrey Wever a duna aprobacion pa un abogado di renombre for di Curacao yega Aruba pa representa e Departamento di Impuesto den un procedimiento sumario cu ta planea pa diaranzon 28 di mei. E motibo principal tras di e procedimiento ta relaciona cu e deseo di Mike di Meza pa bira minister, pero Departamento di Impuesto no ta emiti un carta positivo y ta acuse di a acueta inmoral cu belasting .
Mike de Meza a keda indigna pa e hecho cu sin su consentimiento, su mesun colega di gabinete a aproba un accion cu obstaculisa su aspiracion politico. Den su defensa, Geoffrey Wever a sali den media pa bisa cu e nunca a aproba pa e abogado representa Impuesto, pero cu su autorisacion tabata puramente pa asesoramiento legal.
E clarificacion no a calma e situacion: Mike de Meza ta sinti’e traiciona, y amenasa pa retira di coalicion. Di otro banda, Geoffrey Wever ta sinti presion pa proteha e integridad di e institucion y pa sigui tuma desicion den interes di pueblo Arubano y no den interes di partido politico, den e caso aki di AVP.
E desaroyo aki a pone gobierno den un crísis: un miembro clave ta sinti cu su confiansa a wordo kibra, mientras cu minister Geoffrey ta keda den un skina sin salida. E resultado final por tin consequensia serio pa e stabilidad di e coalicion actual.
Por lo pronto, pueblo ta warda pa mira si Geoffrey Wever lo logra sali for di e situacion sin perde su credibilidad politico ni e apoyo di su aliado interno.
