Dialuna mainta Hues a sigui cu tratamento di e caso penal cu Ministerio Publico a cuminsa contra e homber A.K., kende ta wordo sospecha di a importa marihuana y tabata bende droga.
SOLO DI PUEBLO por a compronde cu awe Hues a dicidi di laga A.K. liber pasobra e grabacion di interogacionnan cu el a pidi di testigonan, cual mester a sosode, Fiscal a bisa cu no tin grabacionnan y lo mester laga Hues Comisario interoga e testigonan.
DECLARA LIBER DI IMPORTA DROGA
Ta asina cu 17 November 2025, Hues a tuma un decision intermedio. Hues a bisa cu abogado mr. Carlo a cuestiona pa declara Fiscal no admisible. E abogado a mustra cu tin documentonan cu a usa como prueba di parti di Polis cu no ta real y no a wordo haya na e cas di A.K. durante investigacion. E abogado a mustra cu por ta cu esakinan a wordo poni door di Polis despues. Ta asina cu Polis a presenta A.K. cu esakinan durante interogacion. Hues ta haya cu no tin motibo pa duda cu a trata A.K. incorecto y a declara Fiscal no admisibel. Pa loke ta e importacion di droga, Hues a mustra cu 26 Mei 2025 e cacho anti droga a reacciona riba un cacha. A.K. a bisa cu riba e asunto di matanan di droga e no sa di nada. El a bisa cu el a cumpra algun net di muskita. Hues a bisa cu for di documentonan ta mustra cu berdad A.K. a busca net di muskita. Hues a sigui bisa cu ta aparece riba e documento nomber di A.K. y un otro persona. El a remarca cu no a haci investigacion riba e otro persona. Hues ta haya cu no tin ningun prueba cu A.K. lo a importa droga. Hues a declara A.K. liber di importacion di droga. A palabra cu 8 December 2025, lo sigui cu e caso caminda lo evalua interogacionnan cu abogado mr. Carlo a cuestiona.
NO TIN GRABACION DI INTEROGACION
Hues a instrui Fiscal pa busca grabacion di interogacion di dos persona: P. y R. Awe mainta Hues a bisa cu Fiscal a informa cu no a haya grabacion di esakinan y ta sugeri pa laga Hues Comisario interoga P. y R.
Abogado mr. Carlo ta haya cu mester stop cu e tipo di cosnan aki y mester haci husticia na fabor di A.K. E abogado a bisa Hues cu teniendo cuenta cu sentencianan recien den caso di marihuana, mester laga A.K. liber, pendiente di e interogacion na Hues Comisario.
Hues a puntra A.K. kico e ta pensa. A.K. ta haya cu ta basta di ta 6 luna sera y no tin claridad. El a puntra kico ta pasado. E ta un asunto personal of kico realmente ta pasando.
SOSPECHOSO LAGA LIBER
Hues a pospone e caso un rato pa e evalua. Ora el a bolbe den sala di Corte, el a bisa cu e ta haya cu mester scucha e testigo P. na Hues Comisario. Hues ta haya cu tur e tardamento aki pa haya claridad, mester laga A.K. liber. El a ordena pa awe mes, laga A.K. liber. Hues a pospone e caso pa Februari 2026.
