E tratamento di caso Flamingo den apelacion, a tuma henter e siman aki. E abogado mr. Odor a hiba defensa pa su cliente R.Wever kende tabata coordinador di e team encarga cu dunamento di tereno.
SOLO DI PUEBLO por a compronde cu mr. Odor ta haya cu Hof mester declara R.Wever liber mescos cu Corte den Promer Instancia a haci cu F.Abath den caso Avestruz. E abogado ta haya cu mescos cu F.Abath, R.Wever tabata cumpli cu instruccion di ex minister y como tal no ta culpabel.
E abogado a mustra cu R.Wever a wordo condena pa malversacion y falsificacion di carta. E abogado a bisa Hof cu Wever tabata traha riba instruccion di Oduber. E abogado a mustra cu Wever no a falsifica carta y no a haya beneficio di esaki.
WEVER A CUMPLI CU INSTRUCCION DI ODUBER
Na opinion di mr. Oduber, Wever a haci tur cos a base di orden di Oduber. E no por nenga instruccion di Oduber sino lo a sufri consecuencia di no a cumpli cu orden di ex minister.
E abogado a mustra cu Wever a haya instruccion di Oduber pa haci cambio den e double booking di tereno na Malmok. Wever a cumpli cu e instruccion, caminda a traha e carta pa G. indicando cu e no ta haya e tereno. E abogado a sigui bisa cu e cambio no a causa consecuencia pa Aruba.
E abogado a remarca, cu si e director di DIP e tempo ey no a mira nada malo den haci cambio, por conclui cu Wever a haci e trabao manera a wordo pidi. E abogado a bisa Hof cu Wever no tabata sa cu e tabata haci algo malo. E abogado a bisa cu no tabata Wever su intension di haci malo. Ta ariba indicacion di Oduber y e director di DIP, Wever a haci cambio den carta pa G.
MESTER DECLARA WEVER LIBER
Mr. Odor a presenta na Hof e sentencia den caso Avestruz, caminda Ministerio Publico a persigui F. Abath di ta envolvi den dunamento di terenonan. El a musta cu e abogado di F.Abath y Abath mes a splica den Corte cu Abath tabata considera e cartanan cu e tabata haya di ex minister Sevinger, como instruccion y a cumpli cu esakinan debidamente. Ta asina cu Hues di Corte den Promer Instancia a declara Abath liber di tur acusacion. Mr. Odor a bisa Hof cu por considera e situacion di su cliente Wever e mesun cos cu esun di Abath. E abogado ta haya cu Wever mester wordo declara liber pasobra e tabata cumpli cu instruccion cu el a haya di ex minister Oduber y di e hefe di DIP.
