Den un continuacion di su relato publica via video riba Facebook, e abogado y ex-parlamentario Desiree Croes a amplia riba un confrontacion explosivo cu a tuma luga durante un reunion di Partijraad di AVP. Croes a splica cu el a asisti na e reunion, no como miembro, pero pasobra nan a pidie pa bolbe join e partido pa e por a defende su ex-colega Benny Sevinger, kende un grupo den e partido tabata kier saca.
Desiree a duna di conoce cu e ta un persona cu ta para p’e hendenan cerca di dje, y no por a tolera cu esaki lo a pasa cu Benny Sevinger, kende ya ta pasando den un situacion dificil. Sin pensa dos biaha, el a asisti na e reunion cu mas di 60 hende presente, y a keda sorprendi pa e problemanan mas grandi cu tabatin dentro di e partido cu e no tabata na altura di dje.
Na un dado momento, Gerlien Croes a lanta para y a grita e nomber di Mike Eman masha duro. Sintiendo un falta di respet, Desiree a lanta y a “para” Gerlien, exigiendo respet pa Mike Eman su “cabey shinishi.” E confrontacion a sigui ora Gerlien a puntra Desiree kico e ta pensa di reunionnan di fraccion cu ta tuma luga tras di su lomba. Desiree a contesta, mustrando Gerlien cu e ta haciendo e pregunta na e persona robes, ya cu e mes a para so pa su creencianan pa hopi aña y no tin miedo di haci e lucha su so.
