Dobbel standard y abuso cu placa di pueblo a cuminsa den Gabinete AVP-Futuro
MIENTRAS CU MEP A HIBA PROFESIONALNAN DEN BIAHENAN DI TRABOU,
AVP-Futuro ta hiba nan prensa comprometi pa lidera delegacion di Aruba
Oranjestad — Por a tuma nota cu AVP no a siña nada y no ta laga nan mal costumber pa gasta placa di pueblo. Aruba a bolbe tuma vuelo den e cielo ironico di política. Pa 7 aña largo, partido AVP y su prensa comprometi a para vigila cu nan lensnan grandi den besindario di aeropuerto ora cu nan haya sa cu ministernan di Gabinete Wever-Croes ta biaha pa exterior pa reunionnan, desicionnan y acuerdonan importante manera tawata e caso tambe cu reunionnan cu IMF. Sinembargo, nan lensnan solamente por a capta e transparencia cu cua e viahenan aki tawata wordo haci.
Ministernan di Gabinete Wever-Croes, semper a biaha cu meta y mision transparente sinembargo AVP y nan prensa comprometi semper a acusa nan di ta haci biahenan di luho pa gasta placa di pueblo. Gabinete Wever-Croes, den 7 aña a maneha y viaha semper cu profesionalismo acompaña pa expertonan local riba topiconan concerni y mas tanto posibel a uza cobertura di medionan den exterior pa garantisa transparencia y eficiencia y sigur tambe pa mantene pueblo informa.
Pero awo cu AVP-Futuro tin e timon, ta parce cu e standardnan pa viahenan di trabou a bira flexibel un biaha mas manera tawata e caso di tempo cu AVP tawata goberna den pasado.
E delegacion recien pa e reunionnan cu IMF, ta dirigi no solamente pa e Minister nobo di Asuntunan Economico, Geoffrey Wever, pero tambe pa Brian Koolman, reportero di 24ora, kende a para dilanti aeropuerto critica tur viahe di Ministernan di Gabinete Wever-Croes. Sinembargo, su record periodistico ta inclui tur cos, menos economia of finansa. Sin un base formal den finansa publico, Koolman a logra pa sinta banda di lidernan financiero internacional, representando un pais cu ainda ta sinti efectonan di pandemia, cu presion fiscal y debe grandi causa pa Mike Eman y partido AVP y tambe e debe di Covid.
Ironia ta, cu mientras AVP ta flota den nubenan, hibando Koolman, cu no tin profesionalismo den expresa tampoco den asuntonan financiero, Telearuba siendo e planta nacional di Aruba, cu si tin profesionalnan den e tereno periodistico, no a forma parti di e delegacion aki. Esaki ta un indicacion cu AVP, cu autorisacion y sosten di Gerlin Croes di partido Futuro, ta sigui cu nan mala maña di gasta placa di pueblo faboreciendo nan prensa comprometi pa asina nan por cumpli cu nan promesanan cu e medio periodistico aki.
Nos ta puntra nos mes, unda e bosnan di preocupacion ta awo? Unda e lensnan grandi pa vigila gasto inecesario di e gobierno aki ta? Unda e parlamentarionan critico di AVP y Futuro a keda?
Laga nos cla: Aruba merece representacion internacional, especialmente ora ta bay reuni cu IMF riba e debe— pero sigur no a costa di transparencia, no via favoritismo, y ciertamente no cu figura di prensa sin experiencia den diplomacia periodistico, economico y financiero.
Si esaki ta e “Futuro” cu nan a priminti nos pueblo, Aruba mester vocifera su mal contento cu e gastamento di placa aki cu ta inecesario, na unda solamente e medio di prensa aki lo wordo benificia un biaha mas manera tawata e caso den pasado.
