Diadomingo den careda di 11’or y di anochi a sosode un accidente basta serio cu dos persona herida den Caya G.F. Betico Croes. E accidente a sosode un poco pabou di e rotonde verbindingsweg (ex Marathon). Mesora a pidi pa presencia di polis y ambulance.
Chauffeur di un Nissan Note shinishi, pa un of otro motibo a perde control y a bay dal contra un cura di cas y a kibra esaki. Segun e chauffeur un auto lo a dal nan y a sigui bay. E chauffeur tabata keha di dolor na su stoma y un ocupante cu tabata sinta patras a a cuminsa saca sanger for di su boca.
Na yegada di polis y ambulance, e chauffeur no tabata na e sitio mas, door cu e tabata herida y tabata tin hopi dolor na su stoma, esnan na e sitio a opta pa no keda warda riba ambulance pero pa transport’e cu un auto particulier pa hospital.
E otro herido tabata un dama cu tabata sangra for di su boca, e si a keda na e sitio y despues cu e la wordo trata pa paramediconan di ambulance nan a dicidi di transport’e pa hospital pa un checkeo medico mas avansa. Slachtofferhulp tambe a wordo pidi pa bay hospital pa asina atende cu e victimanan y nan famia.
