Savaneta – Un tragedia a sosode Diadomingo anochi riba e caminda principal di Savaneta, resultando den e morto di un homber riba motocicleta. E accidente, cu a tuma lugar rond di 8:00 di anochi, a involucra dos auto y un brommer, y a laga comunidad den shock.
Segun testigo ocular, e accident a sosode na altura ex-House of Cake, banda di e entrada pa Piscina Olimpico di Savaneta. Un pickup, un Honda Fit y un motociclista a accidenta fuertemente unda e chofer di e brommer a perde su bida cruelmente y instantaneamente.
Ayudo a presente rapidamente
Ambulance a yega lihe na e sitio, pero ya no tabatin nada cu nan por a haci pa e victima. Dokter a wordo yama pa constata morto, mientras team di sosten di Slachtofferhulp a brinda asistencia na famianan y testigonan.
Polis a cera e caminda pa investigacion, unda specialistanan di trafico a cuminza analisa e situacion pa determina e causa exacto di e accidente.
Segun por compronde, un cambio di direccion abrupto di e pickup por ta causa di e accident.
E prome accidente cu moto di 2025
Esaki ta e prome caso registra di accidente cu morto pa e aña 2025, segun vocero di polis a bisa.
E identidad di e victima no a ser revela ainda, pendiente notificacion di su famia. Investigacion ta sigui mientras.
