Alcohol y velocidad halto ta keda causa morto den trafico na Aruba. Chauffeurnan ta keda core iresponsabel riba nos careteranan, alcohol y velocidad halto ta e causante principal di accidentenan di trafico.
Ni cu tanto concientizacion, ni cu tanto publicacion, no tin ora di dia cu chauffeurnan bou influencia ta subi tras di stuur of tambe chauffeurnan no ta mantene nan mes na e velocidad maximo permiti.

E prome diadomingo di luna di october ta habri hopi tristo, un dia scur pa Aruba, cu e cuminsa cu un hoben di 24 aña a hoga den un pool na Palm Beach y despues den oranan mas laat di mainta den Colony, un baby, su mama y su tanta ta fayece den un accidente di trafico.

Sero Colorado, Colony:
Diadomingo den careda di 10’or y 35 di mainta a sosode un accidente fatal un poco pazuid di e entrada di Colony.

Un Nissan Skyline preto cu dos persona den dje lo tabata biniendo di panort cu velocidad hopi halto, pa un of otro motibo e chauffeur lo tabata coriendo zigzag riba e caminda y net na momento cu di pazuid tabata biniendo un Chevrolet Aveo cora, den e Aveo tabata tin dos dama y tres baby. E Skyline a hala na su man robes y a dal frontal contra e Chevrolet Aveo.

E impacto tabata asina fuerte cu tres persona den e Chevrolet Aveo a fayece mesora na e sitio. E tres fayecidonan tabata un baby di apenas 2 aña, su mama y un ruman muhe di e mama. Segun nos a compronde e mama y e tanta a bay un rato lama cu e criaturanan y tabata bayendo cas. Den e Aveo tabata tin dos baby mas cu a keda seriamente herida.

E ocupante di e Skyline tambe a keda gravemente herida, mientras e chauffeur a keda herida pero su situacion no ta grave.

Segun nos a compronde di polis cu e chauffeur di e Skyline lo tabata bou influencia.

Varios unidad di Polis a presenta na e sitio y a cera e caminda. Tres ambulance a presenta pero lamentabelmente no por a haci nada mas pa 3 di e victimanan, nan a fayece durante e impacto. E tres ambulancenan cu urgencia a transporta tur 4 herido pa hospital. Varios patruya di polis tabata staciona na lugarnan strategico pa asina habri caminda pa ambulance por yega mas lihe cu ta posibel hospitaal.

Specialista di trafico y departamento tecnico di polis tambe a presenta na e sitio pa haci mas investigacion. Ad Patres Funeral Home a busca e curpanan sin bida di e damanan y e baby mucha homber di apenas dos aña.

LEAVE A REPLY

Please enter your comment!
Please enter your name here