Diasabra mainta a drenta informe di un accidente na e rotonde banda di Superfood, mesora a dirigi patruya na e sitio. Bayendo na e sitio a drenta otro informe su aki ta trata di un auto chikito preto parecido na un Getz y ta bandonando e sitio. Informe adicional a indica cu e bumper dilanti cu e plachi number a keda atras.
Polis na su yegada a hala e palo di lus for di caminda y ora a controla e number esaki ta registra na un adres na Moko. Na Moko ta un compleho di apartamento pero a compronde cu e persona doño di e auto no ta biba eynan. Polis a rondia den e registro di incidentenan y a logra haya sa cu esun cu tabata core cu e auto e dia di e incidente ta biba na Tanki Leendert.
Ora a bay na e adres ey a haya sa cu e doño di e auto ta biba ey cerca mes na Tanki Leendert. Ora polis a bay na e adres ey a bin haya sa cu e doño a huur esaki cu un muhe y a duna polis e number. Ora polis a yam’e e no ta contesta. Polis a keda si purba mas despues.
