Green Corridor/ Pos Chikito – Diamars den oranan di mainta pasa di 11’or informacion a drenta di un accidente serio na Pos Chikito, ariba Green Corridor entre e brug nobo y rotonde di Pos Chikito.
Patruya di trafico cu ta na Balashi mesora a sali pa tira bista y berdad memey caminda e la topa dos truck, un di e compania Bright Bakery y e otro ta un cu ta zorg pa mantene e berm di Green Corridor.
No ta conoci pa nos exactamente con e accidente a sosode, pero informacion cu nos ta dispone di dje ta indica cu e truck di Green Corridor tawata haciendo trabou di mantencion.
Dos persona a resulta herida, e chauffeur di e truck di pan lo a ricibi un herida na su man y un trahado di Green Corridor tambe a resulta herida pero no sa con grave.
Rotonde di drive in a wordo cera direccion pa San Nicolas y rotonde di Pos Chikito direccion Oranjestad mesun cos. E motibo tawata cu unda e autonan a dal ambos banda di caminda tawata tin cos gespart, y e autonan a keda pega cara pazuid ariba e berm.
Dos ambulance a presenta y a transporta esnan herida pa Hospital.
Representante di ambos compania a presenta na e sitio pa tuma nota di loke a sosode.
