Gobierno ta continua cu su accionnan pa kita vehiculo bandona for di caminda publico, cu enfasis riba responsabilidad di doño di auto y e importancia di mantene nos barionan limpi y bunita. Durante e accion di awe den area di Madiki, Timonstraat y Korvetstraat, un total di 11 vehiculo a wordo kita for di caminda publico. Miguel Wever di Ministerio di Asunto General a splica cu e accion ta forma parti di e trabou cu e Task Force ta realisa pa atende e problematica di vehiculo bandona den diferente bario di Aruba.
Segun Wever, e accionnan ta progresando bon, pero e mensahe principal ta cu cada doño di vehiculo mester asumi su propio responsabilidad. E intencion no ta solamente pa kita vehiculo for di caminda publico, sino tambe pa crea mas consentisacion entre nos ciudadanonan tocante e importancia di cuida nan propio medio ambiente. Durante e accion di awe, un total di 11 vehiculo a wordo kita for di caminda publico. Di esakinan, a touw 4 vehiculo door di Cuerpo Policial Aruba (KPA), 2 vehiculo door di un empresa priva na gasto di nan doñonan, mientras cu 5 vehiculo a wordo movi pa tereno priva door di nan propio doñonan. Ademas, 2 doño a firma un declaracion di distancia nan mes di e vehiculo, autorisando pa nan vehiculo wordo destrui.
Wever a indica cu, lamentablemente, ainda tin doñonan cu no ta tuma e mensahe na serio. Pa e motibo aki, e autoridadnan lo continua cu accionnan den diferente bario, caminda vehiculonan cu no ta cumpli cu e reglanan lo wordo atende y doñonan lo mester asumi nan responsabilidad. Durante su declaracion, Wever a expresa agradecimento na Bureau City Inspector, polisnan di bario, Cuerpo Policial Aruba y Serlimar pa nan colaboracion den e accionnan. El a destaca cu e cooperacion entre e diferente instancia ta esencial pa logra resultado concreto y mantene e areanan publico limpi.
E accionnan lo continua den otro bario di Aruba, cu e mesun mensahe pa comunidad: cada ciudadano tin un responsabilidad den cuido di su bario. Gobierno di Aruba ta haci un apelacion na doñonan di vehiculo pa no laga nan auto abandona riba caminda publico, sino pa tuma e medidanan necesario pa evita cu autoridadnan mester interveni.
