Durante e mas reciente Accion di Bario, e colaboracion entre gobierno, organisacionnan y stakeholdernan a sigui fortalece e impacto den comunidad.
Zoey Conijn di Luna Foundation a expresa su gratitud pa por acompaña e iniciativa y enfatisa e importancia di presencia directo den bario.
“Nos ta contento pa por ta parti di e accion aki. Ora nos ta den bario, nos por mira directamente kico ta e necesidad real di comunidad,” Zoey a comparti.
Segun Luna Foundation, hopi di e situacionnan cu nan ta haya, ta refleha cu tin famianan cu ta haci nan miho esfuerso, pero cu por uza un tiki mas orientacion y apoyo — particularmente den bienestar di mascota/ animal y condicion general di casnan.
Durante e bishita cas pa cas, a identifica necesidadnan concreto manera:
- Limpiesa di patio y entorno
- Desperdicio grandi
- Y situacionnan social cu mester follow up adicional
Un di e stakeholdernan, meneer Koolman, cu a participa durante e accion a indica cu, ora bo cana den bario, bo ta mira cu necesidad ta mas grandi cu solamente limpiesa.
“Tin hende cu ta biba den condicionnan dificil. Tin famia cu tin poco recurso. Esey ta mustra con importante ta pa nos sigui bay bario pa bario pa brinda atencion y yudansa concreto.”
E mensahe ta sigui: Aruba tin hopi progreso, pero tin tambe ciudadano cu mester apoyo. Accion di Bario ta sirbi como un instrumento directo pa identifica y ataca necesidadnan real, creando consciencia y fortaleciendo solidaridad den comunidad.
Cu 18 di Maart acercando, e yamada tabata tambe pa tene nos isla limpi y sigui traha hunto pa un Aruba digno pa tur hende.
