E Accion di Bario cu recientemente a tuma luga na Madiki a bolbe crea oportunidad pa Prome Minister Mike Eman acerca comunidad, scucha directamente loke ta preocupa habitantenan y mira unda un man di ayudo por haci diferencia.
Accion di Bario ta un iniciativa cu Prome Minister Eman y su team ta realisa regularmente den diferente bario di Aruba. E idea ta pa no warda solamente pa necesidadnan y preocupacionnan yega Gobierno, sino pa bay den comunidad, combersa cu habitantenan y, caminda ta posibel, busca solucion hunto cu e instancianan concerni.
Na Madiki, e contacto personal cu habitantenan tabata un parti importante di e accion. Durante e bishita, residente a comparti su gradecimento cu Prome Minister pa e ayudo cu el a ricibi. E señora a conta cu e no tin hende pa yud’e cu cierto trabounan y cu p’e, e man di ayudo cu el a ricibi tin hopi significado.
Den su combersacion cu Prome Minister, el a expresa tambe su satisfaccion cu su situacion actual y a menciona su pensioen. Cu palabra senciyo pero sincero, el a gradici Mike Eman personalmente y a dese’e bendicion pa sigui cu su trabou.
E tipo di encuentronan aki ta mustra un otro dimension di Accion di Bario. Banda di trabounan cu ta ehecuta den e vecindario, e bishitanan ta crea espacio pa scucha historia y necesidadnan individual cu no semper ta visibel for di afo.
Pa Prome Minister Eman, e contacto directo cu comunidad ta keda un parti importante di su manera di traha. Den diferente bario, habitantenan ta haya oportunidad pa comparti nan preocupacion, pero tambe pa expresa nan aprecio pa medidanan cu ta sinti directamente den nan bida diario.
Un di e temanan cu particularmente entre pensionadonan ta genera reaccion positivo ta e aumento di pensioen, un medida cu Gobierno a duna prioridad desde cu Prome Minister Eman a asumi cargo. Na Madiki tambe, e contacto cu residentenan a mustra cuanto impacto medidanan cu toca directamente e entrada y calidad di bida por tin pa un persona.
Accion di Bario ta sigui cu un meta senciyo pero importante: acerca Gobierno na comunidad, scucha, mira loke ta necesario y pone man na obra caminda ta posibel.
Pa Mike Eman, cada bario tin su propio necesidadnan y cada habitante tin su propio historia. E contacto directo ta yuda Gobierno comprende ambos miho y sigui traha cu e realidad di comunidad como punto di salida.
