Durante di e ultimo Accion di Bario cu a tuma luga na e bario di Verano, Win Werleman di Serlimar, a duna un impresion di con a bay cu e cantidad di desperdicio cu a hiba for di e bario. Mirando cu hopi habitante tin reto pa deshaci di nan desperdicio di cas, esaki ta keda acumula den cura cu tur consecuencia pa e higiena den e bario. Aki por papia di entre otro cashinan bieuw, cama, matras, frigidair, stoof y un cantidad grandi di artefactonan grandi cu ta dificil pa deshaci di nan mirando cu no tur tin transporte.
E problema structural di desperdicio den bario a surgi na momento cu durante di e gobierno anterior, na un manera descabeya a dal portanan di e dump na Parkietenbos cera sin percura pa otro opcionnan prome. Ademas di e cera e dump sin percura pa alternativa, a comercialisa e posibilidadnan pa deshaci di desperdicio locual a percura pa un aumento drastico den e tarifanan pa deshaci di sushi residencial.
E iniciativa di Accion di Bario, ta pa duna un man den trece limpiesa bek den e barionan cu mas tin mester, y Werleman ta di opinion cu mester hasta pone bakinan den bario den fin di siman tambe pa cada habitante haya e oportunidad pa deshaci di nan desperdicio segun nan por.
