Cada edicion di Accion di Bario ta brinda un oportunidad pa conoce un comunidad for di cerca, no solamente pa identifica necesidadnan cu ta pidi atencion, pero tambe pa tende directamente di habitantenan, conoce iniciativa local y descubri e historia cu ta forma identidad di cada bario.
Durante e recorrido mas reciente den Socotoro y Rancho, e contacto directo cu residentenan a bolbe mustra e impacto di e forma di traha aki. Caminando den e barionan y papia cu e hendenan cu ta biba ey, ta sali informacion cu no semper ta visibel for di un oficina: preocupacionnan di bida diario, luganan cu tin balor pa comunidad, historia di famia y hasta elementonan historico cu ainda ta conserva den e area.
Den Socotoro, por ehempel, Comision Sokotra a comparti e investigacion cu nan ta haciendo pa documenta pasado di e bario. Nan trabou ta inclui informacion relaciona cu agricultura, aloe y crecemento di Socotoro como comunidad, demostrando con iniciativa di propio habitantenan por contribui na conservacion di memoria local.
Na Rancho, e recorido a brinda otro ehempelnan. Na Koningstraat, atencion a bay pa casnan tradicional cu ta carga historia di diferente generacion y cu famianan tin interes pa conserva. Durante e caminata den e bario, habitantenan a comparti tambe informacion tocante posnan historico cu ainda ta accesibel den e area, agregando un otro elemento na e historia di Rancho cu merece pa sigui documenta.
Pero Accion di Bario no ta trata solamente di pasado. E contacto cu habitantenan ta brinda oportunidad pa tende tambe kico ta pasando awe: unda tin necesidad, kico por mehora y cua asunto ta importante pa calidad di bida den e comunidad. E informacion cu ta sali durante cada recorido ta yuda crea un imagen mas completo di cada bario y di e puntonan cu merece seguimiento.
E balor di Accion di Bario ta precisamente den e combinacion aki: sali afo, cana e comunidad, scucha su hendenan y mira e realidad cu propio wowo. Na mes momento tambe brinda e ayudo na e habitantenan cu e parti di limpiesa y embeyecimento di e bario. Cada esfuerso ta yuda na encurasha mas bario ta envolvi den mantene nan area limpi.
Socotoro y Rancho a bolbe demonstra cu cada bario tin mucho mas cu solamente su cayanan y casnan. Cada comunidad tin su propio memoria, identidad, necesidadnan y potencial, y contacto directo cu su habitantenan ta esencial pa comprende con por sigui traha hunto pa fortalece e bario y Aruba.
