Diahuebs mainta durante di Accion di Bario den De Vuyst, comunidadan local a haya un oportunidad pa papia directamente cu Prome Minister mr. Mike Eman y expresa nan preocupacion-, speransa- y necesidadnan. Esaki a lanta hopi emocion y reconocemento den comunidad, specialmente pa e bishita di Prome Minister Mike Eman y e compromiso continuo di e gobierno AVP-Futuro.
Sr. Arnold Matthew Conliffe, residente di e bario, ta contento cu Prome Minister a yega su bario. “E atencion pa adulto mayor, ayudo social, y e sosten financiero cu e gobierno ta duna ta un bendicion,” Conliffe a bisa. “Placa no ta yega y costo di bida ta halto. Mi ta gradici e apoyo.”
Habitante Sra. Barbara Wygnall, di origen Jamaiquino pero bibando hopi aña caba na Aruba, a scucha hopi promesa di politiconan cu nunca a cumpli despues di eleccion, pero e biaha aki tabata diferente. “Despues di Covid, nada no a cambia den e bario, ni e luznan cu a priminti nan no a drecha. Pero mi ta optimista cu awo cos lo cambia,” Wygnall a bisa. Ademas e ta gradicido na Prome Minister Eman pa e aumento di 250 florin, ya cu esaki ta yude cumpra cuminda, y cubri su gastonan di utilidad.
Sr. Errol Mitchell, un di e prome habitantenan di De Vuyst desde 1999, a duna un relato di desaroyo den e bario. For di comienso di e proyecto, e area no tabatin asfalt, despues di diferente peticion pa asfalta e compleho, a logra porfin. Despues a cuminsa pone luz den e bario. Poco poco por a mira e desaroyo den bario.
Den perdiodo di 2009 a forma e comision De Vuyst caminda a implementa diferente proyecto pa e bario, entre otro e speeltuin como tambe e landscaping. Despues di un tempo e comision a cay for di otro y hunto cu n’e tur otro cos. Area designa pa ta uno recreativo, a bira un abandono total.
Ta aplaudi e gobierno, Prome Minister Mike Eman cu e Accion di Bario, pa e iniciativa di yuda e bario un biaha mas y eleva e standard di bida y e decencia den cada bario. Ta boga pa e accion aki, cu ta necesario, no ta solamente un biaha, pero bira algo continua y sostenibel. Na mes momento e ta contento tambe cu e plan nacional di reforestacion, e mes ta un hende cu a planta varios mata den su cura y cu sosten di e proyecto, e por sigui incentiva mas hende den bario. Mantencion ta e factor cardinal den e exito di e accion den bario y ta spera cu lo por asigna un grupo pa keda responsabel pa esaki.
