Pa varios decada parce cu no tin solucion concreto ainda pa loke ta e problema di cacho cu pushi riba caya na Aruba. Durante hopi aña, organisacionnan local manera Luna Foundation, Stimami Sterilisami, y Crijojo Trappers Aruba a traha sin descanso pa controla e poblacion di bestia riba caya cu recurso limita. E gruponan aki ta enfoca riba programanan di sterilisacion, hopi biaha cubriendo e gastonan pa e proceduranan pa asina por yuda doñonan di bestia y controla e cantidad di bestia riba caya den bario cu recurso limita. Socionan manera Paws United y Animal Welfare Alliance Aruba tambe ta contribui cu evento pa crea conscientisacion y promove adopcionnan. Sin embargo, mas esencial cu tur esaki por ta, e esfuerso akinan so no ta basta pa un problema cu hopi otro nivelnan y puntonan pa atende.
Stimami Sterilisami Foundation ta un organisacion cu ta lidera e iniciativanan den loke ta retonan di populacion di cacho riba caya cu ta sigui crece. E iniciativa proponi pa Yesenia Arends y estableci pa Bucuti & Tara Beach Resort na 2016, oficialmente a bira un fundacion na 2018. E organisacion aki ta funda ambos Paws United y Animal Welfare Alliance Aruba den loke ta iniciativa di spray & neuter. Nan no tin fondonan ilimita, pero nan ta cay den e liña di gruponan di sterilisacion riba nos isla.
Pa hopi aña, organisacionnan localnan aki manera Stimami Sterilisami, Luna Foundation, Crijojo Trappers Aruba y Nine Lives – kende ta maneha e problema di pushi riba caya tambe – ta traha incansabelmente pa controla e populacion di bestia riba caya cu recursonan limita. Cu tanto esfuerso y dedicacion, oranan largo di trabao boluntario, toch tur e iniciativanan aki mientras cu nan ta hopi esencial, por solamente haci locual cu nan por pa enfrenta un situacion cu tin tanto punto pa adresa.
Den cuadro cu esaki, ACCION21 a revela un plan nobo y humano pa maneha e krisis aki na un manera sostenibel y di largo plaso. Miles di cacho y pushi sin cas na Aruba ta trece reto no solamente pa esnan cu ta defende derechonan di bestia, pero tambe pa loke ta salubridad publico y stabilidad ambiental di nos comunidad. A base di un plan di accion concreto y coordinacion na tur nivel, ACCION21 ta dedica pa atende e problemanan aki p’e proximo cuater aña bay ariba.
Vision di ACCION21 pa cambio duradero
Pa ACCION21 e siguiente puntonan den plan di partido ta loke lo pone na prioridad pa finalmente cuminsa trece cambio duradero den e retonan aki. E puntonan ta lo siguiente:
- Incorpora conscientisacion di bestia y medio ambiente den e curiculo di scolnan preparatorio y basico.
- Lo controla den oranan iregular tambe manera anochi y den weekend pa delitonan di medio ambiente, molester y abuso di bestia (di cas)
- Ta importante educa nos isla cu deshaci di nan bestianan no ta aceptabel y un mascota ta un compromiso pa bida di e bestia. Nos no ta kere den crea un localidad pa acomoda tur bestia di caya paso esey lo duna impresion cu nan por wordo descarta. BOA mester traha cu e NGOs pa educa y ofrece ayudo caminda ta necesario. Mester haci doñonan di mascota mas responsabel.
- Mester introduci un punto central pa denuncia abuso di bestia. Esaki no mester ta KPA mas y tur e peso no mester bay riba nan mas pa loke ta e problema aki, mester un number fiho cu ta habri semper y tur denuncia ta wordo traspasa pa e team di BOA. Team di BOA ta traha den shift y mester ta disponibel den weekend tambe.
Enfoke riba sosten politico y responsabilidad etico
A pesar cu e organisacionnan local ta haciendo un diferencia grandi cu hopi progreso toch,
ACCION21 ta enfatisa riba e importancia di un accion político consciente pa asina por sigura cu e implementacion efectivo di legislacion y distribuimento di recurso necesario ta tuma luga. Cu sosten gubernamental y responsabilidad, Aruba por logra un avance sostenibel pa realmente cuminsa atende cu e crisis di bestia riba caya.
Atendiendo preocupacionnan di comunidad
Un publicacion reciente a pone duda si mandando bestianan for di Aruba pa Merca ta un solucion of simplemente un operacion di negoshi lucrativo. Den nan respuesta, Luna Foundation Aruba Inc. a desmenti e reclamo aki, afirmando cu tur operacionnan di e fundacion ta transparente y enfoca solamente riba bienestar di e bestianan. “Nos por bisa sin duda, no, e no ta un solucion y no, no ta un negoshi,” segun Luna Foundation. E fundacion – respetando libertad di prensa a pesar cu varios cos publica no tin base di hecho – ta libremente invita comunidad y media pa bini wak e labor pa nan mes y wak con cada donacion ta wordo uza pa yuda bestianan di un manera responsabel.
Manera Luna Foundation a declara publicamente, ACCION21 ta sostene e mensahe aki tambe invitando tur hende na Aruba pa usa nan plataformanan social pa sosten y accion positivo y constructivo, pa uni na esfuerso pa nos yuda e movimiento aki, pa bini wak e dedicacion di e ekiponan di tur e fundacionnan y organisacionnan cu ta trata cu e problema aki, y asina nos por forma un isla caminda bienestar di bestianan y responsabilidad ambiental ta wordo aprecia y semper salvaguardia.
