Discurso di Prome Minister na e Foro di Inversion Mundial organisa UNCTAD
ORANJESTAD – Prome Minister Evelyn Wever – Croes a duna un discurso na e Foro di Inversion Mundial organisa pa United Nations Conference on Trade and Development (UNCTAD). Durante di e conferencia a trata entre otro e tema di “Atrae y retene inversionnan di turismo. Prome Minister a inicia su discurso dunando splicacion di e importancia di e sector turistico pa Aruba.
“E sector turistico a contribui na casi 74% di Aruba su GDP den 2019. 2020 tabata un aña cu a inicia fuerte, sinembargo den algun luna tur cos a cambia, mundo completo a cambia,” Prome Minister a accentua.
Poniendo bienestar y siguridad di pueblo na prome luga, Gobierno di Aruba a introduci un “lockdown” temporario di nos frontera na comienso di 2020. Como cu ya no tabatin vuelo cu turista biniendo Aruba, e decision aki a resulta den desempleo repentino y problemanan di likides. Consecuentemente, pa por a retene y aumenta confiansa den inversionistanan local, Gobierno a provee diferente forma di alivio financiero, subsidio salarial y alivio fiscal pa individuo y negoshinan.
Prome Minster a sigui splica cu na mes momento Gobierno di Aruba inmediatamente a escala e enfoke riba maneho di crisis. Esaki a inclui entre otro, implementacion di un revision di e strategia di e plan di mercadeo y tambe e aplicacion “Aruba Health & Happiness Code” cu a yuda na sigura e aspecto di siguridad y bienestar di bishitantenan di Aruba y localnan.
Segun Premier Wever – Croes, “Aruba a enfoca riba crea un medio ambiente sigur, sano y confiabel pa su bishitantenan y ciudadanonan”. Pa por move padilanti, Gobierno di Aruba a bin cu un manera nobo di pensa y a organisa esfuersonan coordina na nivel nacional pa desaroya un plan di recuperacion economico y tambe un plan innovativo. Di e manera aki ta busca un crecemento economico cu ta sabi, inclusivo y sostenibel cu ta enfoca riba pone e condicionnan crucial na nan lugar pa un economia resiliente pa termino largo logrando asina beneficionan inmediato na termino corto cu un apoyo nacional mas amplio.
Terminando Prome Minister Wever – Croes a bisa cu, “Mientras cu Aruba ainda ta experenciando e efectonan di e pandemia, ta kere fielmente cu cooperacion entre organisacionnan publico y priva, ta fundamental pa Aruba su exito. E accionnan cu Gobierno di Aruba a tuma a resulta den recuperacion di Aruba su sector turistico mucho mas prome cu a proyecta. Pa cual ta conseha pa organisacion y nacionnan inverti den partnership corecto pa asina por yega na recuperacion economico.”
