SOLO DI PUEBLO a tuma nota di un articulo di Partido Raiz den cual ta insinua cu Minister Endy Croes no kier acudi na Parlamento.
Tocante e comentario reciente di Presidente di Parlamento, Raymond Kamperveen, referente na e falta di disponibilidad di Minister Endy Croes pa presenta na Parlamento, ta necesario pa aclara e situacion di un manera corecto.
For di 4 di october 2024, Minister Endy Croes ya a confirma oficialmente su disponibilidad pa presenta na Parlamento dia 15 di october 2024. Esaki a ser comunica den un manera formal via email na Secretaria di Parlamento. Tambe, Minister Croes a aclara den un conferencia di prensa cu e fechanan anterior, es decir 3 y 7 di october, no tabata posibel pa motibo di compromiso preprograma, incluyendo reunionnan importante cu profesor di Hulanda cu ta trahando riba leynan di enseñansa den cuadro di landspakket.
Por lo tanto, cualkier insinuacion di falta di integridad of transparencia no ta basa riba realidad. E Minister a demostra su disponibilidad y respet pa e institucion democratico di nos pais, reafirmando su compromiso pa presenta den Parlamento riba e fecha acorda pa duna informacion. Ta lamentabel cu cierto grupo ta usa e situacion aki pa manipulacion politico, enbez di duna prioridad na interes nacional.
Ta responsabilidad di tur pa garantisa un debate politico basa riba hecho y no riba speculacion. Minister Endy Croes, ta afirma su compromiso cu transparencia y ta cla pa acudi pa Parlamento.
SOLO DI PUEBLO ta keda straña cu Raiz kier hunga e weganan aki, pa purba na crea duda riba Minister Endy Croes.
