Un bida sin oracion ta un bida bashi, pasobra oracion ta comunicacion cu Dios, y tur hende mester di Dios den nan bida pasobra Dios ta nos rosea, for di Dios nos ta hanja tur cos.
Un pais cu no ta haci oracion ta bay poco poco den decadencia, pasobra maldad, inmoralidad, inhusticia, rebeldia , orguyo, arogancia lo tuma control, y asina e pais completo lo cay den scuridad.
Tin hopi pais cu tin hopi placa, pero pa motibo cu no tin respet pa Dios, inmoralidad ta reina, y nos ta mire ta sosode tur dia, pasobra hopi tin Dios den boca, pero E no ta den nan curason.
Nos a yega asina leu riba e mundo aki cu tin manera un competencia cu Dios, cambiando nomber di Dios, cu hopi sabiduria y trosemento di palabra sin kier reconoce cu ta un Dios so tin y si no tin reconocemento di Cristo Hesus como Senjor y Salbador tin algo cu no ta bon.
Pasobra ta solamente Cristo a muri na crus y ta E so a resucita despues di tres dia for di morto, y a subi na cielo y ta sinta na man drechi di Dios Tata Todopoderoso.
Y ta pesey nos mester dirigi tur nos oracion den nomber di Cristo Heus.
Na prome lugar nos oracion mester ta constante, 1 Thesalonisensenan 5:17 ta para scirbi : Haci oracion sin stop.
Tambe nos mester haci oracion humilde y sincero, di henter nos curason y sin ningun clase di duda.
Tur nos peticionnan mester wordo trece dilanti di Dios, cu suplica y gradicimento.
Pa Dios ningun peticion ta grandi, y ningun peticion ta imposibel, basta semper e ta den boluntad di Dios, pasobra Dios no ta sali for di Su boluntad pa complace ningun hende.
Si un hende kier haci algo for di boluntad di Dios, e ta funcionando den su mes forsa y e lo mester carga e consecuencia di locual cu e ta haci.
Mateo 6:6 ta para scirbi con hende mester haci oracion bisando : Ma abo ora bo ta haci oracion,bay den bo camber di mas paden,y ora bo sera bo porta,haci oracion na bo Tata cu ta den scondi,y bo Tata cu ta mira den scondi lo recompensa bo.
Oracion ta poderoso, oracion ta kibra cadena di tur clase di maldad, oracion ta habri caminda, oracion ta trece bendicion, oracion ta trece liberacion. Tur locual cu nos presenta den oracion Dios ta scucha, y si e peticion ta den Dios su boluntad nos por tin sigur cu nos lo ricibi contesta di Dios.
Mescos tambe ora nos ta haci oracion nos mester pordona( Marco 11:25) pasobra falta di pordon ta pica y pica ta aleha hende for di Dios.
Tur nos peticionnan mester wordo companja cu gradicimento na Dios, pasobra Dios tin poder, y ora nos ta haci oracion, nos ta demostra cu nos tin confiansa den Dios, cu e por resolve tur locual cu nos ta pidi, di acuerdo cu su rikesanan den gloria den Cristo Hesus.
Mescos cu Hesus a bisa Su Tata, cu laga e boluntad di e Tata tuma lugar y no Hesus su boluntad, awel como disipulo di Cristo Hesus, nos mester tin mesun actuacion, asina demostra cu nos ta cu Senjor.
Ora nos dobla nos rudia dilanti di Dios, na prome lugar nos mester confesa nos picanan, pa asina nos ta liber su dilanti y nos ta cuminsa presenta nos peticion cu confiansa, pasobra ta Dios nos ta pidi y no hende.
Oracion ta necesario, den tur ocasion, den tur hogar y famia.
Sinceramente, Pastor Marcel Balootje
