Eleccion ta e parti sagrado di un proceso cual ta duna balor na Democracia.
Esaki ta contene varios etapanan. Tin cu ta dura aña of mas, manera eleccionnan politico.
Den sindicalismo esaki ta menos, pero nos mester pasa den un proceso cu varios reglanan. 1. Dirigentenan den e sindicato, den forma habri ta informa tur miembro cu e sindicato ta
bay tene eleccion, ariba tal fecha o den e siman o luna tal y tal;
2. Ta pidi miembronan cu ta interesa pa pone nan mes como candidato pa ser eligi, no
mas tarda cu tal fecha;
3. Ta informa tur miembro kendenan ta e candidatonan;
4. Ta informa tur miembro e fecha di eleccion y lugar(nan) unda pa vota;
5. Pa e votacion mes, Dirigentenan ta prepara e urna(nan) pa tene e eleccion/votacion;
6. Despues di votacion lihe ta informa miembronan di e resultado di e votacion.
E informacion pa e 4 puntonan clave no a sosode pa e eleccion di SEPPA, dia 11 di juli 2025.
Esey a sorprende miembronan na hopi centronan di Trabao, ora e responsablenan a presente cu e urnanan pa vota. Pues e eleccion di dia 11 juli 2025, no a respeta e reglanan basico y di democracia den sindicalismo ora ta tene eleccion pa lidernan.
E violacion mas grandi ta cu no a tene cuenta cu statutonan di SEPPA.
Secretario General sra Brito ta declara den Diario, pagina 11, dia11 juli 2025, cu ta Congreso a pidi pa eleccion di Directiva, pero nan no a haya e candidatonan rekeri pa esaki.
Ayno, ayno, esaki ta trabao di e Secretario General di SEPPA, ta abo ta dirigi e Comite Ehecutivo pa ehecuta e trabaonan, ningun otro persona. Un Secretario General drechi lo informa miembronan na 2016 caba y asina cada biaha, via un campaña di informacion pa haya miembronan pa forma parti di directiva. Sigur e lo a haya candidatonan pa directiva.
E directiva den SEPPA ta asina importante pasobra e ta controla e finansanan di SEPPA.
Statutonan di SEPPA den e cabes di articulo 10 ta scirbi cu mas tarda den november ta tene e congreso anual di SEPPA y den lid f, ta para cu cada 3 aña, ariba e dia di clausura di e congreso ta tene eleccion pa directiva di SEPPA. Esaki ta wordo ripiti den articulo 15, lid 1.
Pues no ta Congreso/Delegadonan ta dicidi, pero ta statutonan ta dicta esaki. Pa tur hende cu dosplaca di sinti, e eleccion den SEPPA, di 11 juli 2025, no ta cumpli cu e reglanan democratico pa eleccion sindical, tampoco e ta di acuerdo cu statutonan di SEPPA.
Esakinan ta haci e eleccion/votacion di 11 juli ta ilegal. Nos por comprende pakico tin e exigencia di Congreso=Delegadonan pa tene eleccion. Hopi acusacionnan fuerte a sali den prensa e ultimo añanan cu no tin eleccion den SEPPA. Ariba cada 10 di december, Dia Internacional Contra Corrupcion, un miembro di comision11 ta manda comunicadonan na prensa local y cualnan a keda publica. Ora un sindicato ta keda añanan sin tene eleccion, esaki ta corrupcion.
P.e. di directiva di TOPA cual sindicato a keda 15 aña sin tene eleccion, tambe e caso di Magaly Brito, como Secretario General di SEPPA, kende tin como 12 aña sin tene eleccion. Ultimo añanan a sali scirbi tambe, cu sra Brito ta bay defende su mes cu su silencio, pasobra tur acusacion ta berdad, e no por defende su mes. Berdad nunca e a reacciona.
M. Brito 25 aña como lider maximo den SEPPA.
Ta bon pa miembronan di SEPPA sa cu Magaly Brito ta lider maximo di SEPPA for di 16 maart 2.000 (aña dos mil). E tempo ey e presidente di SEPPA a pidi su retiro y Sra Brito como vice-presidente a bira presidente.
Ora e statutonan nobo a drenta na vigor, 5 februari 2010, e structura di SEPPA a cambia y desde e tempo ey SEPPA tin un Comite Ehecutivo, cual organo ta ehecuta e trabaonan den SEPPA, bao encargo di e Secretario General, kende ta e lider maximo di SEPPA. Tambe tin e directiva cu ta haci e controlnan ariba e trabaonan di Comite Ehecutivo. Den e congresonan anual di 2010 y di 2013 tabatin e unico eleccionnan, di acuerdo cu e statutonan nobo di SEPPA y Sra Brito a keda eligi como Secretario General. Pues ya sra Brito tin 25 aña como lider maximo di SEPPA. Un record pa un lider sindical na Mundo, pues un bon candidato pa “Quinnes Record Book” pa loke ta e extremonan.
Parti dos
Hopi pregunta cu sra Brito mester contesta, di su maneho den SEPPA y Tesorero di CAPA. E Secretario general di SEPPA como lider maximo di SEPPA ta destruyendo reglanan correcto di democracia cu nos tabata conociendo.
Si tuma na consideracion loke a pasa den e Cooperativa di Miembronan di SEPPA, CAPA, tocante un ladronicia di F 382.000,=. Comision 11 a pidi e register di miembronan, di acuerdo cu statutonan di CAPA, pa yama reunion cu miembronan. Directiva di SEPPA a para ariba un NO. Comision 11 a bay Corte y Corte a dicta cu comision 11 tin rason pasobra e ta para den statutonan di CAPA. Tambe e landsverordening cu ta regarda Cooperativismo en general, tin mesun stipuacion, di acuerdo cu e otorgamento di e registro di miembronan. Pakico comision 11 kier e registro di miembronan, esaki pa di acuerdo cu statutonan yama un reunion cu directiva di CAPA pa nan duna cuenta y mas detayenan di un ladronicia di F 382.000,=. Directiva di CAPA, cu su Tesorero, sra Brito cu sigur tin e bos mas grandi den directiva di CAPA, nan ta bay apela e caso.
- Apesar cu e desicion di Juez ta bisa cu entrega di e registro ta para den e statutonan di CAPA;
- Den e ley, landsverordening op Cooperatieve Verenigingen AB 1987 no. GT8, tabata un ley na Antiyas prome cu 1986, despues a bira ley na Aruba y cual ley ta stipula e reglanan cu Cooperativanan mester eherce. Den articulo 11; lidD; 3, e entrega di e register di miembronan tambe ta parti di esaki.
Toch directiva di CAPA ta dicidi di bringa e desicion di e Jues y e ley cu ta regarda stipulacionnan den Cooperativismo, den corte di apelacion. Nan no tin ni e minimo chens pa empata, corda pa kibra e desicion di Juez y kibra un ley existente. Loke tur hende mester analisa ta cu nan no kier pa e claridad ariba e robo di F382.000,= sali. E pregunta grandi ta, kico tin scondi eytras ?
Awor tin e menasa di un hurista, consehero hudicial di SEPPA y CAPA, den direccion di miembro(nan) di comision 11. E hurista aki kende pa motibo di a comete delito(nan) a ser saca for di Orden di Abogadonan. E no tin autoridad mas como abogado, pero toch ta menasa y pretende hasta di lanta caso contra miembro di comision 11 den corte.
Ora nos analisa e situacion, ta bisto cu tur cos ta draai ront di e ladronisia di F 382.000,=.
Tesorero di CAPA = Magaly Brito = Secretario general di SEPPA cu e añanan sin directiva, sin control financiero, sin decharge y cu un hurista cu a ser saca for di abogacia, e proverbio Hulandes SOORT ZOEKT SOORT ta na su lugar. Quo Vadis SEPPA/CAPA!!
Tambe tur e sucedidonan aki ta pone hopi hende pensa cu loke ta pasando den SEPPA y CAPA ta pa crea un cultura pa accepta impunidad como algo legal y normal.
No Por, Nos di comision 11 ta lucha pa para e cultura malo aki.
Informacionnan di Secretario General di SEPPA M. Brito ariba directiva for di 2016.
Ta bon pa tur hende tuma nota di e revistanan di SEPPA, e ultimo añanan.
Den e revista di december 2016 ta para bao punto 2. Directiva: Sra S. Rietwijk, sra J Maduro, sra J Rasmijn y M Orman, nada mas.
E compañeranan aki a wordo eligi den congreso anual di 2013, nan a ser eligi pa 3 aña, e ultimo aña cu tabatin eleccion pa directiva di SEPPA, nan periodo como miembro di directiva a termina cu e congreso di 2016 na november 2016. Pues ta informacion incorrecto pasobra, segun statutonan di SEPPA, na december 2016, nan no por ta miembro di directiva mas. Nan tempo a yega y mester a tene otro eleccion.
Den revista di december 2017 ta poni cu Directiva no a keda cla cu e cantidatonan pa eleccion directiva nobo. Manera keda dicidi, e directiva a keda ehecuta e trabaonan hunto cu Comite Ehecutivo. No por, segun statutonan no a eligi directiva. Pues no tin directiva, ademas directiva no ta ehecuta, pero ta controla e maneho di Comite Ehecutivo. Directiva ta eherce e trabaonan di Control, Checks and Balance.
Den e revista di 2018, ta poni ariba pagina 3, cu “Directiva no a logra haya e cantidad di candidatonan pa eleccion directiva nobo”, e fecha cu a keda proponi mester a keda cancela pa falta di mas candidato.
Ta Comite ehecutivo su trabao e ta pa busca candidatonan pa directiva.
Den e revista di december 2019, ariba pagina 2 ta poni cu Directiva ta manda su saludonan di Pasco y Aña nobo 2020. Un directiva spiritu cu no ta existi ta manda saludo.
Despues di 2019 no tin revista/Info di comite ehecutivo/Secretario General mas. Prueba palpabel cu e ultimo eleccion den SEPPA tabata den e congreso di 2013.
Papia berdad ta un virtud cu ta gana guera, cu gañamento semper bo ta perdi
Ora nos lesa pagina 19 di Diario 11 juli 2025, Secretario Genera ta bisa, e.o. cu e ultimo añanan e directiva tabata hopi mas disponible pa entre otro bay den ehecucion di trabaonan tambe acudi na reunionnan hunto cu e Comite Ehecutivo.
AYNO, AYNO, despues di 2013 miembronan di SEPPA no a vota pa un directiva di acuerdo cu statutonan. Sra Brito ta lubida loke e a scirbi ariba pagina 11 di e mesun Diario, 11 july 2025, cu ta “Congreso =Delegadonan a pidi pa eleccion di directiva”, cual ta nifica cu no tin directiva. E posicion pa tene eleccion di directiva sigur ta basa ariba e criticanan den prensa cu SEPPA no tin directiva y tambe a base di informacionnan den e revistanan di SEPPA.
