Diabierna 19 di november 2021, na oficina di CEDE Aruba a tuma lugar e acto di firmamento di un protocol di cooperacion entre Gobierno di Aruba, CEDE Aruba y Samenwerkende Fondsen Cariben. E protocol aki ta conta pa un periodo di 5 aña cuminsando dia 1 di Januari 2022 pa December 2026 y e ta un prolongacion di e mesun protocol di e periodo 2017-2021.

E relacion y cooperacion entre Gobierno, CEDE Aruba y Samenwerkende Fondsen Cariben tin un historia largo. Desde 2004, CEDE Aruba a fungi como partner den co-financiamento. Durante casi 20 aña, e cooperacion a sostene un cantidad grandi di projecto aki na Aruba y a yuda crea un infrastructura valioso di NGO’s. E punto di salida ta cu Gobierno ta sostene CEDE Aruba cada aña cu un suma pa sostene proyecto y desaroyo di NGO’s. CEDE Aruba ariba su turno ta maneha e fondo aki ariba un distancia profesional di Gobierno E sosten di CEDE Aruba na NGO’s ta wordo duna cada bez a base di un plan di maneho pa 5 aña. Cada plan di maneho ta wordo traha den consulta cu diferente NGO’s, departamentonan di Gobierno y diferente stakeholders.

Samenwerkende Fondsen Cariben na e otro banda di e ocean ta consisti di 5 fondo grandi Hulandes cu ta: Oranje Fonds, Kansfonds, Stichting Kinderpostzegels, Fonds Sluyterman van Loo y Roomsch Catholijk Armenkantoor (RCOAK). Cada fondo tin un otro enfoke, por ehempel desaroyo di bario, pobreza, actividad pa adulto mayor, hende cu limitacion, gruponan vulnerable, etc. Cada aña, e fondonan aki ta pone un presupuesto disponibel pa e islanan den Reino Caribense. Asina hunto ta yega na un suma mas grandi pa haci un impacto positivo ariba e islanan.

Durante e 5 añanan di e ultimo protocol, CEDE Aruba hunto cu Samenwerkende Fondsen a sostene varios projecto importante, entre otro a sostene y a hisa e cantidad di programanan pa Centronan di Bario, a pone enfasis den actividadnan pa hoben despues di scol y a sostene hopi actividad pa hende adulto/mayor rond di Aruba. Tambe a inverti den algun proyecto grandi, manera e centro pa hende cu limitacion multiple na San Nicolas, maneha pa Ambiente Feliz, y e ampliacion di e facilidad di Fundacion Contra Violencia Relacional na Aruba. Un otro proyecto grandi ta e introduccion di Signs of Safety, cu a fortifica mas cu 350 profesional cu un forma di traha nobo cu casonan di negligencia y abuso di menor. Banda di esaki, hunto a duna un ayudo grandi durante pandemia, specificamente pa asistencia di alimentacion hunto cu Fundacion pa nos Comunidad y YMCA.

Den practica, fundacionnan ta entrega nan projecto na Samenwerkende Fondsen Cariben por medio di CEDE Aruba. Aki, CEDE Aruba ta revisa e projecto segun criteria y despues ta recomenda y solicita Samenwerkende Fondsen pa sostene e projectonan aki. Den e caso cu fundacionnan mester di sosten pa desaroya proyecto, CEDE Aruba tambe ta duna e servicio aki. Na final, hopi proyecto ta wordo financia conhuntamente entre CEDE Aruba y Samenwerkende Fondsen Cariben. Banda di esaki, Samenwerkende Fondsen Cariben a duna CEDE Aruba un ‘microbudget’, for di cual CEDE Aruba por sostene proyectonan mas chikito, manera iniciativanan y actividadnan nobo den diferente bario.

E acuerdo di colaboracion aki lo continua durante añanan benidero. Unda cu lo trata di haci e forma di traha aki mas eficiente. Un meta adicional pa CEDE Aruba ta pa acerca otro fondonan internacional y recauda su mesun fondonan, entre otro riba propio iniciativa. Durante e ultimo aña esaki a duna su fruto adicional. Asina e colaboracion entre Gobierno di Aruba, CEDE Aruba y Samenwerkende Fondsen Cariben ta algo unico compara cu e otro isla nan den Reino. Ambos partner ta hopi motiva pa sigui brinda sosten na NGO’s y iniciativa di comunidad.

Pa mas informacion por consulta e website nan www.cedearuba.org y www.samenwerkendefondsen.org of por tuma contacto cu oficina di CEDE Aruba na 582-7666. Semper por traha un cita pa explora posibilidadnan, a base di e criteria di ambos organisacion.

Esnan cu a firma e acuerdo aki den representacion di Gobierno di Aruba Minister President sra Eveline Wever – Croes y Minister di asunto social sr Rocco Tjon, representante di Samenwerkende Fondsen Cariben, Henriette Hulsebosch di Kansfonds y Kristal Ashra Oranjefonds, President di CEDE Aruba sra Sheila v Veen y tesorero Dito Reyes.

LEAVE A REPLY

Please enter your comment!
Please enter your name here