“Trabounan grandi a wordo haci y nos tin bon sentimento cu nos lo brinda stabilidad y confiansa pa cada ciudadano”
ORANJESTAD – Despues di casi 2 luna di eleccion na juni ultimo, Partidonan MEP y Raiz a firma e acuerdo pa forma e proximo gobierno di nos pais. Esaki a tuma luga den un conferencia di prensa na Nicolaas Store na San Nicolas. Durante e reunionnan di formacion, San Nicolas Business Associacion a haci un peticion pa firma e acuerdo di gobernacion na San Nicolas. Gobierno ta mira e oportunidadnan di crecemento na San Nicolas y esaki ta bay tin su efecto pa henter Aruba.
E exito di Aruba pa e siguiente 4 aña bou di e gobierno nobo ta bay wordo determina pa con lihe nos por recupera economicamente y nos recuperacion economico ta bay depende hopi di con lihe San Nicolas ta recupera economicamente. Esey lo determina tambe e desaroyo economico di Aruba. San Nicolas lo haña atencion completo den esaki awo cu Aruba ta riba e caminda pa recuperacion di e pandemia.
Prome Minister Evelyn Wever-Croes a indica cu ainda no ta cla pero e ta un paso hopi mas cerca pa nos tin nos siguiente Gobierno. E acuerdo akinan ta e base den liñanan grandi kico Partido MEP y Partido RAIZ ta enfoca riba e proximo añanan den gobierno. Despues di esaki ainda mester finalisa reparticion di carteranan entre Partido MEP y RAIZ y despues ainda pa apunta candidatonan pa Minister pa cada un di e partidonan.
Despues di a wordo nombra Formador Prome Minister Evelyn Wever-Croes hunto cu señor Ursell Arends y respresentantenan di cada Partido, a cuminsa cu reunionnan intenso cu Stakeholders den nos comunidad y a logra na reuni cu 101 stakeholder y e informacion cu a bin di nan a forma e base pa cu e acuerdo aki.
“Nos no a caba ainda. Mas bo scucha kico ta biba den comunidad, mas miho bo por hiba e pais aki padilanti. Ademas nunca ta dimas pa scucha kico ta wordo sinti den comunidad y den pueblo. Mi ta gradici tur 101 stakeholder cu a tuma tempo pa reuni cu nos te cu awor y trece nan puntonan balioso dilanti. Mi ta contento di mira cu nan ta agradecido cu pa prome biaha ta wordo scucha den un proceso asina importante”, Prome Minister a expresa.
Prome Minister a duna di conoce cu ainda falta algun stakeholder externo cu mester reuni cu nan pa despues cuminsa tambe cu esnan interno cu ta e departamentonan di gobierno mes cu tambe por duna un bista di kico tur mester tuma luga.
E programa cu a wordo firma diahuebs anochi ta uno den liñanan grandi na unda ta haci e compromiso tambe cu prome cu fin di october, cada minister ta bay duna su aporte pa asina yega na un programa di gobernacion mas detaya ya cu e ta mas conoci cu kico ta biba den su ministerio. E lo prepara su aporte pe programa di gobernacion cu lo wordo aproba den Conseho di Minister y despues presenta na Parlamento di Aruba fin di october.
“Cu esaki nos ta spera di por trece stabilidad den gobernacion, confiansa di nos ciudadanonan den gobierno pa asina nos como pais y como ciudadanonan por avansa.
Mi kier a gradici e Lider di Partido RAIZ, Ursell Arends y tur e integrantenan cu hunto a yuda pa nos yega asina leu. Tambe esnan cu no ta aki nan cu nos pero tras di cortina cu ta yuda hopi. Trabounan grandi a wordo haci y nos tin un bon gevoel. Nos tin un bon sentimento y ora mi bisa nos por brinda stabilidad y confiansa ta pasobra mi sa cu ta esey nos por ofrece”, Prome Minsiter a enfatisa.
