Den e debate tocante HOFA y e Bestuurlijk Akkoord firma entre Aruba y Hulanda na juni 2024, hopi discusion politico ta concentra riba e pregunta si e acuerdo ta automaticamente ta mara Aruba y si Aruba ainda tin espacio pa haci otro escogencianan politico.
Diferente representante politico a enfatisa cu e acuerdo a wordo firma pa e gobierno anterior lidera pa Evelyn Wever-Croes. Sin embargo, otro grupo ta apunta na contenido di e documento mes, particularmente Punto 9.
Loke Punto 9 ta bisa
Den Punto 9 di e Bestuurlijk Akkoord ta menciona:
“Indien de rijkswet en de betrokken nationale regelgeving niet conform planning tot stand worden gebracht wordt de rente weer verhoogd naar 6,9%.”
Segun observadornan, e frase “indien de rijkswet niet tot stand worden gebracht” ta importante pasobra e ta indica cu e posibilidad cu e rijkswet no yega na aprobacion, ya tabata contempla den e acuerdo mes.
E consecuencia menciona den e punto ta un regreso na e porcentahe di interes original di 6,9%.
Diferencia entre acuerdo y ley
Analistanan legal y politico ta enfatisa cu e Bestuurlijk Akkoord no ta e mesun cos cu e rijkswet HOFA. E acuerdo ta describi e intencion di Aruba y Hulanda pa desaroya y promove un marco legal nobo.
Den e documento ta usa termino manera:
-“uitwerken” (desaroya/traha)
-“bevorderen” (promove aprobacion)
Esaki ta indica cu ainda tin proceso parlamentario y consenso politico necesario pa un eventual aprobacion final.
Discusion tocante suma di spaar
Otro tema cu a wordo ampliamente discuti ta e posibel spaarmento financiero relaciona cu HOFA.
Durante e debate publico, a wordo menciona cu Aruba por logra spaar significativo den futuro. Sinembargo, e informacion nobo cu a wordo presenta den e proceso ta mustra cifra di:
– spaar di aproximadamente 7.5 miyon florin pa aña riba e covid lening;
-Raad van advies a bisa cu no tin ningun claridad riba cual debe mas Hulanda lo tuma over, o sea cualke cifra cu wordo menciona ta nada otro cu “luchtkastelen”.
Esaki a crea discusion adicional tocante e metodologia y e calculacionnan usa pa Gerlien yega na otro sumannan mas halto di 800 miyon.
E discusion ta continua
E debate rond di HOFA ta sigui enfoca riba dos puntonan principal:
- Cuanto espacio politico Aruba ainda tin den e proseso.
- Cuanto beneficio financiero e acuerdo realmente lo trece.
Mientrastanto, Punto 9 di e Bestuurlijk Akkoord ta sigui un punto central den e discusion, pasobra e texto ta menciona explicitamente e scenario den cual e rijkswet no yega “tot stand”.
