Diadomingo 25 di september, Gobierno di Aruba, directiva di CEDE ARUBA conhuntamente cu Samenwerkende Fondsen a firma un adendum basa riba un protocol di colaboracion existente. E adendum aki ta un acuerdo unda cu Gobierno ta aproba un presupuesto adicional di
AWG. 514.400, – cu ta destina pa centro y organizacionan di bario. Tambe tin un otro presupuesto adicional di AWG. 350.000, – cu ta pa sostene iniciativa di fundacionan cu lo mester traha mas intensivo den bario. CEDE ARUBA di su banda lo pone fondonan adicional disponibel y tin e tarea di acerca mas partner financiero pa colabora den esaki. CEDE ARUBA lo maneha y administra financiamento adicional menciona y lo haci’e accesibel pa e organisacionnan di bario y e fundacionnan.
Gobierno di Aruba, CEDE ARUBA y Samenwerkende Fondsen ta convenci cu desaroyo den bario ta importante. Ora cu hendenan topa sea ta riba caya of dentro di un organisacion den e bario of un centro di bario, ta unda ta conoce otro, aki ta siña con pa traha hunto y asina por desaroya ideanan pa yega na un comunidad mas participativo. Dor di stimula mas actividad social, cultural y educativo den barionan, por mehora e relacion entre comunidad y e habitante di e bario specifico, pero tambe entre e habitante y organisacion cu por duna sosten. Esey lo resulta den mas participacion, solidaridad, harmonia y tambe mas seguridad den bario. Na final esaki lo hisa e “capital social” di cada persona. E capital social por wordo defini como e balor colectivo di tur red social entre hende y organisacionan y e iniciativanan cu por sali for di esaki pa hasi mas pa otro.
Durante ultimo 20 aña, e centronan di bario a ricibi un sosten minimo di Gobierno pa nan por eherce nan tarea den comunidad. E trabou di e organisacionnan aki ta depende mas tanto di boluntarismo y riba propio forsa haciendo recaudacion di fondonan pa por logra trece actividad. Varios di e organisacionan aki a enfrenta hopi reto den e ultimo decada. CEDE ARUBA y Samenwerkende Fondsen di hulanda a duna sosten financiero na varios di e centronan y organizacion den bario, entre otro dor di financia un profesional pa guia actividad y tambe ehecucion di e programa di actividadnan. E fondonan di CEDE ARUBA y Samenwerkende Fondsen semper ta temporal y pesey a trece e retonan structural varios biaha na oido di Gobierno y departamentonan y nos ta contento cu awe e día a yega cu nos por yuda p asina trece un cambio. Gobierno a compromete su mes pa e periodo di 2022-2026.
E programa lo hiba e nomber di “BARIONAN UNICO y e meta di e programa ta pa sostene mas iniciativanan comunitario, diversifica e programa y servicionan den bario na diferente grupo y meta. Tambe kier usa e programa pa intensifica colaboracion cu partnernan di comunidad, fundacionannnan y servicionan gubernamental y pa mehora e colaboracion entre e organisacionnan den bario.
Entre otro lo enfoca pa:
- Mehora capacidad di personal di e centro y organisacionnan
- Evalua regularmente e forsanan y necesidad den tur bario cu apoyo di mas organisacion
- Desaroya y ehecuta programanan anual pa e bario
- Crea un sistema facil pa financia iniciativanan chikito den barionan rond di Aruba
- Mehora e accesibilidad y promocion pa actividadnan den bario
- Amplia e financiamento di programa y actividad cu mas partner nobo den futuro
CEDE ARUBA lo provee cu asistencia practico na e centronan y organisacionnan di bario y na mas partners pa por realisa e metanan menciona. E asistencia aki lo enfoca na e necesidad specifico, (‘tailor made’) y na e situacion actual di cada organisacion.
Durante e siguiente simannan lo duna presentacion na e diferente organisacionnan den e area social, cultural y educativo. E idea ta pa haci e programa aki mas participativo posibel, kier men tin hopi espacio pa e organización presenta nan idea y pensamento. E aprobación di e fondonan adicional ta e comienzo di e programa.
