Aruba, Corsou, Sint Maarten y Hulanda a yega na acuerdo pa entrega e proposicion di Ley di Reino Organo Caribense pa Reforma y Desaroyo (COHO). E ley di Reino ta forma e fundeshi pa un forma nobo di cooperacion di mas aña entre e paisnan den Reino.
Economia di Aruba, Corsou y Sint Maarten a keda gravemente afecta pa e pandemia di COVID-19. Hulanda a duna ayudo pa combati COVID-19 y a yuda tambe cu pakete di cuminda. Ademas a suministra un miljard euro na ayudo di emergencia den forma di fiansa di likides pa sostene finansa publico den caso cu diripiente e actividadnan economico paralisa.
Como condicion pa e dunamento di fiansa di likides, a palabra cu e paisnan ta traha acelera riba reformanan cu ta haci nan mas fuerte. E paisnan ta tene nan mes na e palabracion ey. Meta di esaki ta pa economia y comunidad por absorba un crisis miho den futuro, di manera cu e gobiernonan por ofrece oportunidadnan nobo na habitante- y empresanan. Pa apoya e paisnan den esey, a palabra cu ta institui un Organo Caribense pa Reforma y Desaroyo independiente.
Anticipando riba institucion di COHO, a palabra cu Aruba, Corsou y Sint Maarten pa nan cada un, un pakete di pais. Den e sucesivo, agendanan di implementacion ta sigui detaya e medidanan pa cada pais. Di e manera ey, cada pais Caribense por dal paso na un manera cu ta cumbini nan. COHO ta bay duna sosten na y supervisa ehecucion di e temanan describi den e paketenan. E tareanan aki ta ser ehecuta actualmente door di e Organisacion di Trabou Temporal (TWO).
E cuater paisnan a yega e siman aki na un acuerdo definitivo tocante redaccion di e ley di Reino. Cambio den comparacion cu consultanan anterior ta encera palabracionnan mas cla cu e paisnan tocante incorporacion di e paketenan di pais den e respectivo presupuestonan. Tambe a palabra cu den e fase di implementacion lo sigui traha riba e obhecionnan cu tin tocante e competencianan di e supervisornan financiero C(A)ft.
Tambe ta pone riba papel e palabracionnan tocante posibel implicacionnan cu elaboracion di e protocol di cooperacion entre C(A)ft y COHO, y por tin incluso tarea-, funcion- y responsabilidadnan mutuo. COHO y C(A)ft lo consulta cu gobierno di e paisnan tocante e protocol di cooperacion, promé cu realisa of cambia esaki.
Aruba, Corsou y Sint Maarten a pidi atencion pa algun punto di preocupacion pa loke ta ehecucion di e ley denter di e orden huridico constitucional. E puntonan ey ta encera cu ta garantisa espacio pa hiba maneho y autonomia di e gobiernonan, e convergencia entre C(A)ft y COHO, y espacio pa haci inversionnan pa por implementa e reformanan y maneho acompañante. Hulanda a priminti pa hiba deliberacionnan y haci palabracionnan al respeco.
E proposicion di ley awor ta bay Parlamento di e paisnan y Tweede Kamer. Mas despues den e proceso, Eerste Kamer tambe ta trata esaki.
