Den Centro Deportivo Libertador Betico Croes a tuma luga, weekend pasa, e Aruba Open Taekwondo International Tournament 2015.
Cu participacion di clubnan local y internacional manera Tiger Taekwondo Academy, Estrella Taekwondo Acadeny, Chaco Taekwondo Academy, Impact Taekwondo Academy, Barbados Taekwondo Club y Yusin Taekwondo Suriname, e torneo a conta cu mas di 60 atleta. E refreenan internacional tabata Masternan Erik Barry, Moises Dumfries y Auggie Tromp. E medico presente tabata dr. Guaicaipuro Jimenez.
Despues cu e cantante Arubano Julissa Bisslip a interpreta e himno di Aruba y speechnan di Moises Fernandez di ATB y Soraya Boekhoudt di ASU, e prome competencianan di Poomsee a start y siguientemente e competencia di Kyorugi a sigui te 8’or di anochi.
Addonsito Croes tabata e MC di henter e torneo y cu esaki, e ta desea di gradici Aruba Taekwondo Bond y tur sostenedor pa e confiansa brinda. Tambe danki na organisacion di Sportsubsidie Aruba, Comitee Olimpico Arubano, ASU y tur colaborador di e evento. E torneo a cuminsa 9:30 di mainta y pa 8:00 pm tur resultado tabata conoci.
Por a ripara cu mas y mas e nivel di competencia ta sigui subi y cu atletanan local por competi cu cualkier atleta internacional.
