Den e sala principal di Arubiana-Caribiana den Bachstraat, a tuma lugar un anochi unico y bunita titula: Conversatorio Ito Tromp: “duna mi dos placa di palabra”.
Un anochi caminda Ito Tromp, di 87 aña, tawata rondona pa su famia, su amigonan y tur esnan cu tanto cariño y aprecio ta sinti pa e gran Arubiano ‘ki cu ta dedicando su bida na Aruba su cultura y historia general. Tawata Zetsia Ponson y Renwick Heronimo esnan cu a conduci e anochi unda cu Ito tabatin e oportunidad di reacciona riba cada etapa di su bida. Mas cu 40 aña na Radio Kelkboom cu e programa Butishi di Alegria y sin lubida e quiz “Scucha, Pensa y Contesta”. Tambe a pasa Ito su trayectoria den DCA, Radio Nederland Wereld Omroep, Ito su entrevistanan cu celebridadnan grandi Arubano entre otro y su aporte enorme pa nos idioma Papiamento.
Tur presente tawatin e oportunidad pa brinda palabra di aprecio y admiracion na nos baluarte Ito Tromp. Den e publico por a mira personahenan local manera entre otro Parlamentario Xiomara Maduro, Joyce Pereira, Ramon Todd Dandaré, Luc Alofs, Deliomar Laclé, Mieckey Gravenhorst, Victor “Toko” Winklaar, Edselyn Figaroa, Desiree Correa, Olga Buckley, Roberto Croes, Mayra de Graaf, Ernesto Rozenstand, Sharin Croes y sin lubida Ito su rumannan, señora, yiu Vicky y nieto.
Tambe mi admiracion pa esnan di BNA cu a haci e anochi posibel manera Zetsia Ponson, Renwick Heronimo, Yorleny Oduber, Robby Solognier y Deliomar Lacle cu no ta di BNA, pero cu a digitalisa e tapenan di Ito presenta.
Na nomber di mi persona y mi famia, nos ta desea Ito tur clase di éxito mas pa futuro y pabien na Arubiana-Caribiana cu e bunita homenahe brinda na Ito, awor na bida. Nos a disfruta inmensamente y nos ta contento cu e legado di Ito Tromp lo keda pa semper digitalisa desde awo.
