WILLEMSTAD – Den un movecion cu a hala atencion internacional, e gigante di paña deportivo Adidas a selecciona e artista Arubiano Jeon como e cara pa inaugura y presenta e ‘away kit’ nobo di e seleccion nacional di Curacao.
E escogencia aki a tuma lugar durante un evento exclusivo caminda Adidas a lanza e “away kit” di tur e paisnan cu nan ta patrocina, incluyendo seleccionnan cu ya a clasifica pa Mundial y otronan cu ta den e proceso di eliminacion. Loke ta bini dilanti ta e autonomia di Adidas den e proceso aki; e marca mes a encarga su mes cu e buskeda di e figuranan cu mester a representa cada nacion, sin necesariamente depende di e federacionnan local.
Un escogencia basa riba influencia cultural
Pa e campaña aki, Adidas a pone su bista riba artistanan, modelonan y influencernan cu tin un impacto fuerte riba rednan social y den cultura popular. Den e caso di Jamaica, por ehempel, nan a traha estrechamente cu e Bob Marley Foundationy a scohe Skip Marley pa e presentacion.
Pa representa Curacao, Adidas a keda impresiona pa e alcance di Jeon, especialmente debi na e exito rotundo di su cancion ‘Mama Wak’. Maske e artista ta orguyosamente di nos isla Aruba, Adidas a acerca Jeon pa e ta e imagen pa inaugura e uniform di Curacao. E decision aki ta resalta con e arte di Jeon ta uni e islanan den region y ta resona te na nivel di marcanan mundial.
E presentacion aki no solamente ta duna briyo na e kit nobo di nos bisiñanan, sino tambe ta demostra e nivel di reconocimento cu e talento di e islanan ABC ta ricibi awor aki den e industria di moda y deporte internacional.
